Kommunimut qinikkat tamarmik Qaanaami ataatsimiilersut
Avannaata Kommunianut ilaasortat naapillutik ataatsimiissagaangamik Ilulissani kommunip ataatsimiittarfianiittarput. Ilaasortalli oktobarimi ataatsimiilerpata inersuaq ataatsimiiffiusartoq inoqassanngilaq.
Qinikkammi 17-it atorfilittat ilaat peqatigalugit Qaanaami siullerpaamik atuarfiup aulani oktobarip arfineq-aappaanni ileqquusumik ataatsimiissapput.
- Kommunalbestyrelsep aalajangernikuaa, kommunalbestyrelsep ataatsimiinnera ataaseq ukiup ingerlanerani ataasiarluni ilulissat avataani ingerlattassasoq. Taamaattumik massakkut Qaanami qujanartumik pisussanngorpoq, Avannaata Kommuniani borgmesteri, attaviitsoq, Palle Jerimiassen KNR-mut oqarpoq.
Avannaata Kommunianut qinikkat Qaanaamut siusinnerusukkut angalasarput. Angalanerilli siulii allatut siunertaqartarput. Qinikkammi tamarmik peqataanatik partiit siuttui ataatsimiititalianilu assigiinngitsuni ilaasortat taamaallaat angalasarnikuupput.
Akileraartartut aningaasaataannit akilerneqassasoq
Qinikkat aqutsisuata suleqatigiit Ilulissaniinnatik Qaanaami ataatsimiinnerat iluaqutaassasoq oqaatigaa.
- Ilaasortanut immaqa Qaanaamiissimanngitsunut pissutsinik paasinninerunermik aamma kinguneqartussaavoq. Aamma innuttaasut kommunalbestyrelsemi ilaasortat qanimut oqaloqatigisinnaassagamikkit, Palle Jerimiassen
Angalaneq Avannaata Kommunianut millionit affaanik akeqartussatut missingersorneqarpoq.
Taakkua millionit affaasa missaat allamut pitsaanerusumut atorneqarsinnaannginnamik kommunip iluani?
- Politikki akeqarpoq. Innuttaasut politikkerinik takorusullutik piumasaqartarnerat kommunalbestyrelsep aalajangingarivaa. Isumaqarpunga pissusissamisoortoq aammalu pisariaqartoq piffiit tikissallugit. Taamaattumik aningaasaliineruvoq pitsaasoq, Palle Jerimiassen oqarpoq.
Ilaasortat Qaanaami naapillutik ukioq manna juunip 24-anni ataatsimiittussaanikuugaluarput. Angallannikkulli ajornartoorneq peqqutaalluni ukiamut kinguartinneqarpoq.
