Kullorsuarmi Nuussuarmilu internetimut, Raadiumut tv-mullu attaveqaatit aaqqeqqittut

Nunatta avannaani, Nuussuarmi Kullorsuarmilu atortutigut ajoquteqartoqarnera peqqutigalugu attaveqaatit attaveerupput.

Ullut marluk ingerlareersullu nunaqarfimmiut 650-it missaanniittut interneterlutillu, raadiu tusarnaarlugulu tv-kkut isiginnaarsinnaanngoqqipput.

Tusassip attaveqaateqarfiani Nuussuarmi innaallagissap ajoquteqarnera peqqutaalluni, nunaqarfiit taakku marluk attaveerupput.

Tusassimi attaveqaqatigiinnermut immikkoortortaqarfimmi sulisoq, Pipaluk Egede Poulsen taama ilisimatitsivoq.

- Teknikerit Nuussuarmi qaqqami 410 miiterisut portutigisumiittoq attaveqaateqarfik tikippaat. Tamaani innaallagissap aqqutaa ajoquteqartoq maanna aaqqinneqareerpoq, taanna KNR-imut oqarpoq.

AAMMA ATUARUK Kullorsuarmi Nuussuarmilu internetti, oqarasuaatit, radio tv-lu ajoquteqartut

Nuussuarmi Kullorsuarmilu internetimut, oqarasuaatinut, raadiumut tv-mullu pingasunngormat attaviit ajortipput.

Ajornartoornermi innaallagissiuut akunnerit arlalinni atorneqaqqaaraluarpoq, taannali aamma attaveerutivippoq.

Tusassimi teknikerit Nuussuarmukarniarlutik pujornera peqqutigalugu Nuussuarmut apuunnaveersimasut aamma ilisimatitsissutigineqarpoq.