Kulturikkut illorsuaq Jim Lyngvildip assilisaanik saqqummersitsisussanngortoq
Jim Lyngvildip assilisai Ilulissani eqqumiitsulianik katersugaasivimmi nivingatinneqarnavianngillat. Taakkuli Ilulissani kulturip illorsuani Sermermiuni iikkani nivingatinneqassapput.
Matut sapaatiuppat nalunaaqutaq ataatsimut ammarneqassapput.
- Jim Lyngvildip assilisaanik saqqummersitsinermi siulliunissarput tulluusimaarutigingaatsiarparput. Pingaartumik eqqumiitsuliornermik taperseerusunnerput pissutigalugu, Petra Linda Clasen oqarpoq.
Taanna Sermermiuni aaqqissuussinermi ataqatigiissaarisuuvoq.
- Jimip saqqummersitsivissamik amigaateqarnera paasigatsigu soorunami akisussaaffimmik tigusiniarluta aalajangerpugut. Kulturimmi illorsuaraatigut. Kisianni eqqumiitsulianik katersugaasivik kulturillu illorsua kommunip suliffeqarfiutigai. Taamaammat kulturikkut illorsuup saqqummersitsisussanngornera pissusissamisoorpoq.
Katersugaasiviup aqutsisua ippassaq soraarsinneqartoq
Jim Lyngvildip assilisai tusaamaneqarlualersut eqqumiitsulianik katersugaasivimmi sapaatiuppat saqqummersinneqartussaagaluarput. Ilisimaneqarlereersutulli taamaattoqalinngilaq. Eqqumiitsulianik katersugaasiviup aqutsisua, Mads Mitchell Avannaata Kommuniani sulisitsisuminit ippassaq soraarsinneqarpoq. Kommunip oqarnera naapertorlugu tamanna inummut ataasiakkaamut tunngassuteqarpoq, tamannalu saqqummersitsinissamik oqallittoqangaatsiarneranut attuumassuteqarnani.
AAMMA ATUARUK Kommunimi pisortaaneq isertuussassamik imaqartumik Jim Lyngvildimut SMS-ertoq
Tamanna Mads Mitchellip isumaqatiginngilaa – Jim Lyngvildillu katersugaasivimmi saqqummersitsinissani taamaatinniarlugu ippassaq aalajangerpaa. Taassuma tamanna Ilulissanut tikinnerminit akunnialuit qaangiuttut aalajangerpaa. Maannalu assiutimi saqqummersinneqarnissaanut kulturip illorsuanut isumaqatigiissuteqarluni.
- Saqqummersitsisoqaraangat soorunami assigiinngitsunik qisuariartoqartarpoq. Tamanna ataqqivarput. Inuit isummaminnik oqaaseqarnissamut kiffaanngissuseqarput, Petra Linda Clasen oqarpoq.
Nerisassaanngitsunik tuniniaasoq Borgenimilu runneriusoq
Aqutsisuusimasup katersugaasivimmit matuersaatimi tunniunnissai taamaallaat amigaatigaa.
Mads Mitchell qasuvoq. Assit pillugit februaarimili oqallittoqangaatsiarnerata kingunerisaanik qasuvoq. Aamma soraarsinneqarnermi nammineq inuttut misigisani pillugu qasulluni, KNR-imut oqaatigaa.
Maanna unikkallassalluni, oqarpoq.
AAMMA ATUARUK Soraarsitsisoqarnerata kingorna: Jim Lyngvild Ilulissani katersugaasivimmi saqqummersitsiniarunnaartoq
- Paniga piffissami kingullermi takuallaarnikuunngilara. Tamanna qilanaaraara. Taava eqqarsarpunga Brugsenimi suliffikunnut immaqa uteqqikkusussinnaallunga. Katersugaasivimmi sulilinnginninni nerisassaanngitsunik tuniniaavittaani sulivunga. Aamma Ilulissani immiunneqartumi Borgenimi immikkoortuni kingullerni sisamani runneriuvunga.
Saqqummersitsinissamut qaammatisiut imaqanngitsoq
Jim Lyngvild pillugu oqallinneq februaarip qiteqqunnerani aallartinneqarpoq. Eqqumiitsulianik katersugaasiviup maanna aqutsisorisimasaata Mads Mitchellip taanna saqqummiussassalioqquaa. Mads Mitchell katersugaasivimmi decembarimi sulilerpoq, tassangali saqqummersitsinissamut pilersaarutit imaqarsimanatik.
Mads Mitchellip kalaallit eqqumiitsuliortut qulit tikillugit amerlassuseqartut katersugaasivimmi saqqummiisinniarlugit attaveqarfigai, taakkunganngali arlaannaalluunniit piffissami taama sivikitsigisumi periarfissaqarlutik pisinnaanngitsut taassuma KNR-imut oqaatigaa. Jim Lyngvildilu ”puisit amiinik nuannarinnittoq” attaveqarfigaa.
Jim Lyngvild Ilulissanut ippassaq tikippoq. Nammineq assiutigisaq.
Jim Lyngvild soqutiginnippoq, puisillu amiinik ilusilersukkanik kalaallinit assilitittartunit atorneqartunik pinngortitami assiliivoq.
Assilisittut assini arlalinni uumasutut soorlu uumasoq immap killingani puisit amiinik atisalianik atortutut ilusilersugaapput.
Oqallinnerli aallartippoq. Kalaallit ilaasa Jim Lyngvildimik toqqaaneq assinilu najoqqutarineqartoq nuannarinngilaat.
Klaudia Petersen taakku ilagaat.
"Piumasaannarmik isummersorfissaanngilagut"
- Aasiit allamioq sinnerluta saqqummerpoq. "Uumasuutikka qaasuttut takusigit, pilersitakka takusigit. Uangana nuna piga uangaana kalaaliutikka". Uatsinnik piginnittutut pissuseqarluni takutitsivoq, Klaudia Petersen KNR-imut oqarpoq.
Kalaallip eqqumiitsuliortup assit suliarisimassagaluarai taanna isumaqarpoq:
- Kulturerput tarnikkullu kinaassuserput asuli pisassaanngilaq, piumasaannarmik isummersorfissatut saqqummersitassaanngilaq.
Mads Mitchell umiatsiamik angalaarnissaminut piffissaqaleqqingajalerpoq. Nammineq assiutigisaq
Oqallinneq ullut tallimat missaat qaangiuttut Great Greenlandimit puisit amiinik pisiumajunnaarnissamut atsiornernik katersineq Facebookikkut siammarterneqarluni februaarimi sapaatit akunnerisa naanerini kingullermi aallartinneqarmat annertunerpaalerpoq.
Inuit puisit amiinik atisalianik, taskilianik aaqqasianillu atorlutik assingi ikkussuunneqalerput. Great Greenlandimiimmi pisiumajunnaartoqarpat - nunarput nammineq akiliuteqartuussaaq, piniartummi puisit amiinik Great Greenlandimut tunisisarput, tamannalu aningaasarsiutigalugu.
Assinut tunngatillugu maanna inerniliisoqarpoq, taakkulu Sermermiuni sapaatiuppat takuneqarsinnaalissapput.
