Kunngi Charles innuttaminut tv-kkut ullumi oqalugiassasoq

Tuluit kunngiata Charlesip arnani dronning Elizabeth ippassaq sisamanngornermi ornippaa, toqunissaata tungaanut najorlugu.

Kunngi Charles tv-kkut aallakaatinneqartukkut kunngeqarfiup innuttaannut ullumi tallimanngornermi oqalugiassaaq.

Kunngi Charlesip arnani nersorlugu eqqaaniarniarpaa, kunngitullu pisussaaffini tamakkiisumik atuuffiginissaa neriorsuutiginiarlugu.

AAMMA ATUARUK Dronning Elizabeth toqusoq

Kunnginngortitsinissamut isumalioqatigiissitat Londonimi St. James Palacemi arfininngorpat katersuuppata, Charles kunngitut pisortatigoortumik aatsaat ivertinneqassaaq.

Charlesip kunnginngorluni niaqoruserneqarnissaa kingusinnerusukkut aatsaat pissaaq.

Inuppassuit Buckingham Palacep silataani ullaarnganiit naasuliipput, aviisillu dronningi nersorniarpaat.

Tuluit Nunaanni dronningip toqunera pisortatigoortumik ullumi tallimanngornermiit ulluni tulliuttuni arfineq-marlunni aliasuutigineqassasoq, tuluit Bucking Palacemi kunngikkormiuisa ullumi tallimanngornermi nalunaarutigaat.