Akiuussutissap boosteritut atorneqartussap akuerineqarnissaa nakorsaatinut aqutsisoqarfiup innersuussutigigaa

Coronavirusimmi allannguutaannut marlunnut akiuussutissat marluk EU-mi atorneqarsinnaasussatut akuersissutigineqarnissaat, nakorsaatinut Europami aqutsisoqarfiup, EMA-p, ippassaq sisamanngornermi innersuussutigaa.

Akiuussutissap aappaa nakosaasiorfinnit Pfizer/BioNTechimit ineriartortinneqarsimavoq, aappaalu Modernamit. Nakorsaasiorfiit taakku coronavirusimut akiuussutissaasa nutarterneqarneraneersuupput.

Modernap akiuussutissaliaa nunatsinni atorneqarnerpaajuvoq.

EU-p peqqinnissamut kommissæriata, Stella Kyriakidesip aalajangerneq oqaaseqarnermini nersualaarutigigaa, AFP paasissutissiivoq.

- Europamiut ukiaru ukiumullu tuniluuttoqaqqileratarnissaanut illersornissaat pingaaruteqarpoq, taanna oqarpoq.

Taassumalu ukiaru covid-19-ip tuniluutileqqinnissaanut EU-p piareersimanissaa pisariaqartoq ilanngullugu oqaatigaa.

Akiuussutissat nutaat coronavirusimut siullermut allannguutaanullu Omikronimut akiuussutissatut atorneqarsinnaapput.

AAMMA ATUARUK Nakorsaanermit kaammattuut: Tuniluuttoqalissaaq - akiuussusertigit - aammalu

Akiuussutissat nutarterneqartut aqqaneq-marluleereersimasunut ikinnerpaamillu marloriarlutik kapitereersimasunut atorneqarsinnaanissaat eqqarsaataavoq.

Akiuussutissat nutaat covid-19-ip allannguutaanut aalajangersimasuinnarmut samminnginnerat nutaartaraat. Akiuussutissat nutaat allannguummut omikronimut aamma tulluarsagaapput.

EU-Kommissionip akiuussutissat nutarterneqarsimasut EU-mi atorneqarsinnaanersut akuerisussaavaat. Aalajangiinissaatalu erngertumik pinissaa naatsorsuutigineqarpoq.

Modernamit akiuussutissaq nutarterneqarsimasut Tuluit Nunaanni aggustip qaammataani akuerineqarpoq. Tuluit Nunaallu nunanit allanit siullerpaalluni akuersisuulluni. Tamatuma kingunitsianngua Schweiz Australialu aamma akuersipput.

EU-mi nunat akiuussutissat ukiut marlungajaat matuma siorna akuerineqartut assingi ullumikkut suli atugaraat.

EMA-mi innersuussinerup saniatigut Danmarkimi peqqinnissamut oqartussat Folketingillu peqqinnissamut tunngatillugu oqaaseqartartui tallimanngornermi ataatsimiipput. Ataatsimiinnermi akiuussutissat nutarterneqarsimasut oqaluuserisassanut ilaapput.

Danskit peqqinnissamut ministeriat Magnus Heunicke peqqinnissamullu oqartussat suliaq tamanna pillugu tallimanngornermi aamma tusagassiortunut katersortitsissapput.

Coronavirusip ukiaru tuniluutilertoqqinnissaata ilimagineqarnera sioqqullugu akiuussutissat nutaat pineqartut atorneqarsinnaasutut akuersissutigineqarnissaat innersuussutigineqarpoq.