Løkke: Takorluukkat piviusunngoraangamik nuannertuaannarpoq

Naalakkersunngortitsinissami akuereqqusanik piumasaqarani naapeqatigiittoqarpat Danmarkimut iluaqutaanerussasoq, Lars Løkke isumaqarpoq.

Allattoq Ritzau

decembarip 14-at 2022 08:39

Nutserisoq Jaaku Lyberth

Ministeriunerusimasoq Lars Løkke Rasmussen Danmarkimi naalakkersuisoqatigiilersussanut ilannguttussanngorpoq.

Taassumami partiia nutaaq Moderaterne Danmarkini SVM-mik taallugit naalakkersuisoqatigiilersussani peqataalissaaq.

Ministeriuninngortussaq Mette Frederiksen kunngikkormiut illussaarsuata Amalienborgip silataani marlunngornermi unnukkut taama nalunaaruteqarpoq.

Folketingemut 2019-imi qinersisoqarmat siammasissumik naalakkersuisoqalernissaa, Lars Løkke Rasmussenip isumassarsiaralugu siullermeerlugu oqaatigaa.

- Ukiut sisamanngulersut isumassarsiaq pinngorpoq. Siammasissumik suleqatigiittoqarnissaa pillugu.

- Taamaattumik suut suleqatigiissutigissallugit isumaqatigiissutigisagut oqaluttuarinissaat qilanaarisorujussuuara, Lars Løkkke Rasmussen oqarpoq.

AAMMA ATUARUK Mette Frederiksenip Venstret Moderaatillu naalakkersuisooqatigilerai

Ullaarmannalumi taamaaliussaaq, tusagassiortunut nunatsinni nalunaaqutaq malillugu arfineq pingasunut katersortitsinermi naalakkersersuisoqatigiilernermi isumaqatigiissut saqqummiunneqassammat.

Mette Frederiksen, Lars Løkke aamma Jakob Ellemann-Jensen naalakkersuisut nutaat tunngavigisaat pillugit tusagassiortunut sassarnermi saqqummiussissapput.

Lars Løkke Rasmussen Marienborgimit marlunngornermi unnukkut angerlartoq TV-eqarfimmit TV2-mit oqaloqatigineqarluni ima oqarpoq:

- Takorluukkat piviusunngoraangamik nuannertuaannarpoq, unnussiorluarisi, Lars Løkke Rasmussen oqarpoq.

Naalakkersuisut nutaat aamma ministerinngortussat Amalienborgimi sisamanngornermi ilisaritinneqassapput.

Nutaarsiassami kukkunermik nassaarsimaguit uunga allaffigineqarsinnaavugut.