LA-mi politiit Oscarinik nersornaasiinermi nakuusertoqarneranik misissuissanngitsut
Los Angelesimi politiit isiginnaartitsisartup Will Smithip quiasaarisartumut Chris Rockimut oscarinik nersornaasiisoqarnerani nakuusernera maluginiarpaat.
- Inuulli nakuuserfigineqartup pisoq politiinut unnerluutiginianngilaa.
Pisoq piffissami kingusinnerusumi unnerluutigineqassappat politiit misissuilerumaarlutik, politiit oqaatigaat.
Chris Rockip pisoq politiinut unnerluutiginiarnagu nammineq oqaatigaa.
Will Smithip nulia pillugu quiasaaruteqartoq
Pisoq ukkatarinniffiungaatsialersoq Oscarimik nersornaasiisartunit kingusinnerusukkut oqaaseqarfigineqarpoq. Tassalu Will Smithip nersornaasiisoqarnerani iliuusai akuerineqanngitsut nakuusernerlu akuersaarnagu oqaatigaa.
- Arlaatigut nakuusernerit akuerinngilagut, Twitterikkut allappoq.
- Oscarimik nersornaasiinerit 94-issaannik ingerlatsilluta ajugaasut suleqatiminnit nunallu tamalaat akornanni isiginnaagassianik nuannarisaqartunnit nalliuttorsiutigineqarsinnaanerat nuannaarutigaarput, Oscarimik nersornaasiisartoq allappoq.
AAMMA ATUARUK Thomas Vinterberg Oscarinnattoq
Chris Rockip Isiginnaagassiamut piviusulersaarummut pitsaanerpaamut nersornaaserneqartussamut tunniussisussanngornermini isiginnaartunut quisaarinerani taama nakuusertoqarpoq.
Assi: Scanpix
Chris Rockimmi Will Smithip nulia, Jada Pinkett Smith taassumalu nujai pillugit quiasaaruteqarpoq. Taanna amikkut nappaammik alopeciamik aamma nujaarunnermik taaneqartartumik nappaateqarpoq. Taamaammat nujaqanngiivippoq.
Will Smith tamatuma kingorna scenemut qaqeriarluni quisaarisartoq patippaa.
Smith aamma Oscarinnattoq
Will Smith patissinermi kingornatigut scenemukarluni isiginnaagassiami “King Richard”-imi angutini Isiginnaartitsilluarnerpaatut nersornaaserneqarpoq.
Taassuma nersornaat inuusaliannguaq tigullugu oqalugiarpoq, qulliilu uluaasigut nakkaapput.
Will Smithip oqalugiarnermini pisoq toqqaannartumik aallakaatinneqartoq oqaaseqarfiginngilaa. Utoqqatsissuteqarporli, taamaakkaluartoq utoqqatsernera toqqaannartumik sumut tunnganera oqaatigineqarnani.
Will Smith aatsaat siullerpaamik Oscarinnappoq. Taanna siusinnerusukkut marloriarluni innersuussaanikuuvoq.
Ilaatigut isiginnaagassiami, Muhammad Ali-mi tilluuttartutut isiginnaartitsisuunini pissutigalugu.
Oscarimik nersornaasiinermi isiginnaagassiaq ”Dune” nersornaaserneqartuni annerpaavoq, taanna arfineq-marlunnik nersornaaserneqarpoq, ilaatigut Nipilerilluarfiunerpaatut aamma Assitalersugaalluarnerpaatut.
Danskinit innersuussaasunit inuusaliamik ukioq manna nersornaatinnattoqanngilaq. Titartakkanik isiginnaagassiaq piviusulersaarut “Flugt” pingasuni assigiinngitsuni nersornaaserneqarnissamut innersuunneqaralurpoq, allalli nersornaaserneqarput.
