Danmarkimi malunnarunnaarsaallutik peqquserlussimasutut pasisat tigusaasut

Danmarkimi inuit 200-t sinneqartut pinerlullutik aningaasarsianik malunnarunnaarsaallutik peqquserlussimasutut pasineqarput taakkulu ilaat arlallit tigusarineqarsimasut, Danmarkimi politiit nalunaarput.

Ullumilu sisamanngornermi ullaap tungaani unnerluutigineqartut ilaat angut 23-nik ukiulik Glostrupip eqqartuussiviani inatsit tunngaviusoq naapertorlugu killisiorneqarpoq.

Taannami allatulaaq sakkortuumik iliorluni aningaasanik malunnarunnaarsaalluni peqquserluuteqarsimavoq. Taassumami pingasoriarluni bankimi kontoni atorlugu inuit allat salloqittarlugit aningaasannaffigisarsimavai.

AAMMA ATUARUK Peqquserlunniat nunatsinni periarfissagissaarnerusinnaanerat politikerit ernumassutigigaat

Pingasoriarlunimi politiiusaartarsimavoq inunnullu uukapaatitaminut sianertarsimavoq, inuit taakkua kontoat qarasaasiakkut pulaffigineqarluni pinerliffiginiarneqalernerartarlugu imaluunniit taakku atii atorlugit aningaasanik atorniartoqarsimanerartarlugu.

Inuit pinerluffigineqartut paasissutissaataat naapertorlugit inuit arlallit pinerlunnernut tunuliaqutaasarsimapput ilaatigut angut 23-t ukiulik taakkununnga akuulluni. Taakku aningaasarpassuarnik kontot assigiinngitsut atorlugit nussuisarsimapput.

Aningaasallu pineqartut ilaatigut 142.000-niit 186.000 koruuniusimapput.