Lars Karl Karlsen kuuginnartumik imeqanngilaq: Baaliami ermiullu atorlugu uffartartoq

Avannaata Kommuniani sanaartugassanut aningaasaliissutissanik missingersuusiornermi nunaqarfinni aqutsisut sumi sunillu sanaartortoqassaneranik maanna sunniuteqarlutik siunnersuuteqarsinnaanngorput.

Periarfissarlu taanna Upernavik Kujallermi Kangersuatsiamilu nunaqarfiit siulittaasuata, Pele Grimip Siumumeersup atorluarpaa.

Taassumami Upernavik Kujallermi illumut kiffartuussivimmut 4,3 millionit koruunit atorneqarnissaat siunnersuutigaa.

- Innuttaasut kissaatigiuagaat qinikkallu sulissutigiuagaat naammassineqartussatut qulakkeersinnaanngoratsigu taanna qujanartorujuuvoq, Pele Grim KNR-imut oqarpoq.

Tamannalu Lars Karl Karlsenip Upernavik Kujallermeersup nuannaarutigaa. Taannami kuuginnartumik imeqanngitsumik nammineq illoqarpoq.

- Illumut kiffartuussivimmut nutaamut aningaasaliisoqarnera tusarakku nunnaangaatsiarlungalu isumalluarpunga. Imermik kuuginnartoqalernissaa pitsaassaaq, Lars Karl Karlsen KNR-imut oqarpoq.

Asattuinnartartoq

Lars Karl Karlsen kuuginnartumik imeqanngitsuni kisimiinngilaq. Nunaqarfinnimi illut imilersorneqartarnerat nalinginnaasuunngilaq. Upernavik Kujallermi innuttaasut 215-it missaanniipput.

- Imermik toqqaannartumik pilersorneqanngilagut. Imertarnissarput pisariaqarpoq. Nunaqarfitsinni suli atortarparput.

Taamaammat angerlarsimaffimmini uffarnissaminut periarfissaqanngilaq, taamaammallu ermiut atorlugu asattuinnartarluni.

- Qangatut asattortarpunga. Soorunami baaliaqarpunga.

Nunaqarfiup siulittaasuata, Pele Grimip nunaqarfimmi innuttaasut illumik kiffartuussivimmik kisimik atuisartuussannginnerat erseqqissaatigaa.

- Uffarsinnaanermut imaluunniit unnuisinnaanermut, akunnissinnaanermut. Peqalerutta illu sullivimmik taamatut uaguinnaanngitsut sineriammiit atuisut aamma atuisinnaanerat aamma ammaanneqassoq, Pele Grim oqarpoq.

Ilanngutitsitsinerup ingerlaannarnissaa neriuutigigaa

Pele Grimip nunaqarfiit siulittaasuisa sanaartugassanut aalajangiinerni ilaatinneqarnerisa ileqquuginnalernissaa neriuutigaa.

Tamannami kommunalbestyrelsip kisimi aalajangiiffigisarnikuuaa.

- Siunissami taamannak ingerlaannassappat peqataatinneqartarlutalu iluarisimaarnartorujussuussooq tamatsinnut nunaqarfimmiunut, Pele Grim oqarpoq.

Kommunilli sanaartugassanut missingersuut missingersuusiornermi tunngavia nutaaq taamaallaat Palle Jeremiassenip borgmesteriunerani atuutissaaq.