Lars Løkkep Ellemann Papelu ministeriunissamik taasisuusaartitsinermi ajugaaffigai

Danmarkimi siornagut Venstret siulittaasorisimasaat ministeriunerusimasorlu, maannalu partiimik nutaamik aallartitsimasoq Lars Løkke Rasmussen, foketingimut maanna qinersisoqassagaluarpat ministeriuninngoqqissinnaalluartoq, isumasiuisartut Voxmeterikkut qinersisartunik isumasiuinerata takutippaa.

Voxmeteri qinersisartunik 795-inik isumasiuimmat qinersisartut sisamamararterutaannit amerlarit, tassa 27,2 procentit Lars Løkke Rasmussen ministeriunissatut piukkuppaat.

Isumasiuinermi aperineqartut 46 procentiisa Socialdemokraatit siulittaasuata maannalu ministeriunerusup Mette Frederiksenip ministeriunertut ingerlaannarnissaa kissaatigaat.

Ministeriuninngornissamut sassaqataasut Venstret siulittaasuat Jakob Ellemann-Jensen17,2 procentinik Konservatiivillu siulittaasuat Søren Pape Poulsen 9,6 procentinik isumasiuinermi taaguunneqartut Lars Løkke Rasmussenimit taanikinnerupput.

Lars Løkke Rasmussen ministeriunissatut sassanngikkaluartoq Voxmeterip isumasiuinermut ilaatippaa, taamaattumillu ministeriunertut piukkussanik taasisuusaartitsinermi inernerusut siusinnerusukkut qinersisoqalersillugu isumasiuisarsimanernut assersuunneqarsinnaanngitsut, nutaarsiassaqartitsivik Ritzau allappoq.

Danmarkimi qinersisartut oqarasuaatikkut oktobarip 19-anni 21-annilu apersorneqarput.

Lars Løkke Rasmussenip partiaata Moderatit isumasiuinermi siuaqqanerat Danmarkimi qinersisartut partiinik qeqqaniinnerusunik pisariaqartitsinerannut takussutissiisoq Avisen Danmarkip aaqqissuisua Casper Dall naliliivoq.

- Lars Løkke Rasmussenip suliaa peqqutaanerpaagunarpoq, tassa arlaannaannulluunniit atajumanngilaq namminnerli toraakkatik tunaartarlugit ingerlanerat taakkununnga iluaqutaavoq. Casper Dall oqarpoq.

Qeqqaniit politikki

Lars Løkke Moderatillu isumasiuinermi siuariariarujussuarnerat Danmarkimi qinerisartut partiinik qeqqaniittunik qinerserusunnerannik takutitsisuusoq Casper Dall erseqqissaavoq.

-Løkkep inunnit puigugaasimanini iluaqutigaa, inuimmi ministeriunerugallarami susimanera puigornikuuaat, eqiterutsitsiniarsimanera puigorsimavaat, pisortallu oqartussaaffiinik ikilisaasimanera puigorsimallugu.

- Politikeritut nutaatut nutaanillu takorluugaqartutut saqqummerpoq, naak partiimi siuttuugallarnerminiit ajornerpaamik inissinnikuugaluartoq. Casper Dall oqarpoq.

Lars Løkke Rasmussen isumasiuinermi nuannarineqarnerujussuani oqaaseqarfigerusunngilaa.

Jakob Engel-Schmidt, Moderatinik politikkikkut aqutsisoq folketingimullu aamma sassartoq oqarpoq Løkkep taamatut sammineqalernera tusagassiorfiit oqallitsitsiumanerannit pilersitaasoq Løkkemi ministeriuninngorniarluni sassanngimmat.

- Taamaassimappammi tusagassiortunut nalunaarutigisimassagaluarparput, Jakob Engel-Schmidt oqarpoq.

Taassuma erseqqissaatigaa Moderatit Mette Frederiksen ministeriunertut toqqarumagaat, pissutsilli apeqqutaatillugit Jakob Ellemann-Jensen Søren Pape Poulsen-iluunniit aamma tapersersorsinnaanerarpaat.

Løkke Altingimi tallimanngorpoq oqarpoq Socialdemokraatit tullianik naalakkersuisuutitaqassasut.

/Ritzau