Lastbiilinik ingerlatsisut akiuussutissamut akerliusut - Ottawami sukannersumik aqutsisoqalersoq
Canadap illoqarfiisa pingaarnersaanni Ottawami borgmesterip Jim Watsonip, Ottawami sukannersumik aqutsisoqalernissaa ippassaq sapaammi nalunaarutigaa.
Ottawamimi aqquserngit lastbiilinit ingerlatsisunit sapaatit-akunnera tamaat assersorneqarnera pissutigalugu angallattoqarsinnaanngilaq.
Canadami nunap immikkoortuisa akornanni angallannermi covid-19-imut akiuussuserneqarsimanissamik piumasaqaateqarneq lastbiilinik ingerlatsisut akuersaarumanngilaat.
Canadami illoqarfiit pingaarnersaanni aqquserngit pingaarnerit lastbiilinik ingerlatsisunit akerliussutsimik takutitsisunit lastbiilinik assersorneqarput.
Lastbiilinik ingerlatsisut 90 procentii akiuussuserneqarsimasut
Canadami lastbiilinik ingerlatsisartut akornanni ikinnerussuteqartut aqqusinernik assersuisut, Canadap ministeriunerata Justin Trudeaup oqaatigaa, amerlanerussuteqarluartummi akiuussuserneqarsimammata.
Lastbiilinik ingerlatsisartut 90 procentiisa missaat tamakkiisumik akiuussuserneqarsimasut oqaatigaa, soorlu aamma Canadami innuttaasut 79 procentiisa ataatsimut isigalugu akiuussuserneqarsimasut
Naggueqatigiit inuit inuunerannut navianartoq
Naggueqatigiit inuit ikiuiniaqatigiiffiat, Tungasuvvingat Ottawami napparsimasunik, angerlarsimaffeqanngitsunik naggueqatigiinnillu inunnik allanik isumaginnittartoq ernumalluinnarpoq.
Akerliussutsimik takutitsinerit naggueqatigiinnut inunnut inuunermik navianartorsiortitsisut ikiuiniaqatigiiffiup tusagassiuutinut nalunaarummi oqaatigaa. Ottawami sapaatip akunnerata siuliani issittorujussuuvoq, akerliussutsimillu takutitsisut pissutigalugit naggueqatigiit inuit oqqiiffissarsiorniarnerat akornuserneqarpoq, taakku siorasaarneqarlutillu nerisassanik tilliffigineqarput, qimarnguinnilu sulisut ajorsaarneqarlutik.
Akerliussutsimik takutitsisut uninnissaannut takussutissaqanngilaq, killormuuanilli akerliussutsimik takutitsinerit Canadami illoqarfinnut annernut allanut siaruarneqarlutik.
