Atuakkiap nuannarineqarluartup malitseqannginnissaa atuartartumit uggorineqangaartoq

Atuagaq 'Qivittuissuit Akornanniinnikuuvunga' nunatta timaani inuillinikuusimasup aqqusaarsimasai atuakkami oqaluttuartinneqarput. 

Amerlasuut atuakkamut upperinnittut Katrine Rasmussen Kielsen facebookkimini allaaserivaa.

Taamaakkaluartoq atuagaq malitseqassanngitsoq atuakkiortup facebookkimini allaaserivaa.

AAMMA ATUARUK Qivittuissuit akornanniinnikuunngikkuit taava tusarnaagassaqarputit

Atuakkiortullu nammineq tamanna aaliangigarinagu facebookkimi quppernermini allappoq. Oqaluttuartullu kalaallit aalassassutissaanik tuniseqqikkusunnginnini peqquginerarpaa.

- Nammineerlunga uuma atuagannguup misigisaqartingaatsiarujussuarpaanga, inuppassuillu aalassassimaassutigigaat maluginikuuara, immaqaluunnit oqarluaannaraani malugingaatsiarnikuuara, Katrine Rasmussen Kielsen facebookkiminut allappoq.

Katrine Rasmussen Kielsenip atuagaq salluliuutitut inuit ilaannit nalilersorneqartoq facebookkimi nalunaaruteqarnamermini ilaatigut oqaatigaa.

- Imaangilaq upperinngiinassagipput, upperinnginniaanarlugit pisinnaangilagut

Qaqortuminngaanneersup Louise Jakobsenip atuagaq atuarsimavaa, taassumali malitseqarniarunnaarnera uggoreqaa.

-Uggornaqaaq, inuppassuit uggorisimassavaat taamak nuannertigisoq.

-Meeraanitsinnili qivittut tusartarpagut, imaangilaq upperinngiinassagipput, upperinnginniaanarlugit pisinnaangilagut, kisiat aamma ilumoortortortaqartassapput pinngitsooratik, Louise Jakobsen oqarpoq.

Atuakkiortup facebookkimi nalunaaruteqarnamermini atuagaq salluliuutaanerarlugu apuussisoqarsimanerarpaa.

-Taanna kusananngilaq taamak nalilersuineq. Atuagarparujussuit atuarnikuugakkit uanga inuusuttuaraallungali. Immaqa amerlasuut uppernarpianngillat, kisiat upperisarpakka, aliikutassiaagamik.

Qivittuissuit akornanniinikuuvunga ulluni makkunani Kalaallit Nunaata Radioani atuffassissutigineqaqattaarpoq.