Múte B. Egede coronamut killiffik pillugu: Naalakkersuisut nalorninartut pillugit marluupput

Naalakkersuisunut ilaasortat marluk peqqinnissammut naalakkersuisoqarfimmut akisussaasuussapput.

Tamanna peqqissutsimut naalakkersuisup, Kirsten L. Fenckerip uippakajaarnini pissutigalugu sulinngiffeqarniarneranik pissuteqarpoq.

Taassuma parteeqataa Pele Broberg inuussutissanut naalakkersuisuusoq peqqissutsimut naalakkersuisuugallassaaq, Mimi Karlsenilu isumaginninnermut naalakkersuisuusoq pisariaqartitsisoqarnerani suliaqartarssalluni, Naalakkersuisut siulittaasuat, Múte B. Egede taama nassuiaavoq.

Nunatsinnimi sumiiffinni arlalinni tuniluunneq annertusiartorpoq, suliassarlu tamanna annertungaarmat naalakkersuisut marluunissaat pisariaqarpoq.

- Suliassaqarfimmut tassunga massakkut inuussutissarsiornermut naalakkersuisoq Pele Broberg akisussaaffimmik kivitsissaaq, peqatigissallugulu aamma pissutsit massakkut nalaattagut eqqarsaatigalugit suliffeqarnermut isumaginninnermut naalakkersuisoq Mimi Karlsen.

AAMMA ATUARUK Naalakkersuisup Kirsten L. Fenckerip napparsimalluni sulinngiffeqarnissani qinnutigigaa

- Marluunissaannik toqqaaneq tassa inatsisitigut soorunami akisussaasoq ataaseq tassaasussaavoq inuussutissarsiornermut naalakkersuisoq, kisiannili nualluummut massakkut eqqugaasut amerlasaqattaarput aammalu suliassat annertupput, taamaammat nalunartut pillugit suliassap tamakkiisumik kivilluarneqarnissaata naammassilluarneqarnissaatalu qulakkeernissaanut taamatut aalajangernikuuvugut.

Coronavirusimik akiuiniarneermik suliaqarneq nalinginnaasumik ingerlaannassasoq taassuma oqaatigaa, taamaammat suliaqartariaatsimi allannguingaatsiartoqarnissaa naatsorsuutiginngilaa.

- Soorunami peqqissutsikkut sulinngiffeqartariaqarnermut taamatut nalunaartariaqarnera inissimaneralu ajuusaarnartuuvoq. Taamaattorli naalakkersuisoqarfiit nakorsaaneqarfik aamma naalakkersuisut partiit peqatigalugit massakkut suleriaasertik ingerlatissavaat naammassisarlugulu, peqqissutsikkut innersuussutigineqartut aallaavigalugit oqaloqatigiinnerit aammalu aalajangersaanerit ingerlanneqartarumaarlutik pisarnitsitut, ukiuni kingullerni coronap atuunnerata nalaani iliuuserisartakkagut aamma tunngavigalugit.

- Sapinngisarput tamaat atorlugu pitsaanerpaamik qulakkeerinninniarneq coronap massakkut siaruaannerata annikillitikkiartornissaanut tunngavissiisuusoq suliarineqassalluni.

Ministeriuneq ataatsimeeqatigiartorlugulu dronningip nalliuttorsiorneranut peqataajartortoq

Kirsten L. Fencker Múte B. Egedep naalakkersuisuutitaqarnerani uippakajaarneq pissutigalugu sulinngiffeqarniartup aapparaa.

Meeqqanut naalakkersuisoq, Eqaluk Høegh uippakajaarnini pissutigalugu aggustimi tunuarpoq.

Taanna ilaqutariinnut, inatsiseqarnermullu naalakkersuisunngortinneqarnermi kingorna qaammatialuit qaangiutiinnartut sulinngiffeqalerpoq.

- Soorunami ajuusaarnartuuvoq naalakkersuisunik taamatut uippakajaarnermik eqqugaasoqartaraangat, aamma peqqissipallannissaanik kissaannartaqaat. Taamaattorli aamma nappaatit takkussinnaasarneri siorngerlugit ilisimasinnaasanngilagut, taamaammallu massakkutulli inissinnerput aallaavigalugu iliuuseqapallattarneq innuttaasullu kiffartuunneqarnissaasa pitsaanerpaanissaanut qulakkeerinninnissaq maanna suliarineqarpoq.

Múte B. Egede piffissami matumani Danmarkimukariartorpoq. Taassuma angalanermini ministeriuneq sapaatip akunnerani matumani ataatsimeeqatigissavaa, nunaniillu allanit sinniisut aamma ataatsimeeqatigissallugit nassuiaatigaa.

- Taassumalu saniatigut dronningip ukiuni 50-ini dronningiusimanerata kingunerisaanik nalliuttorsiornissaanut massakkut kinguartinneqarsimanngitsoq aaqqissuussaq taanna nunarput sinnerlugu peqataaffigisussaagakku.