Maanna aamma Narsami killilersuutit atuutilissapput

Sapangaaqqanik nuisinertulli talligaluttuinnartutut ittumik inoqarfiit coronap aallaavianik ilisimaneqanngiffiusut killilersuiffigineqalersut amerliartuinnarput.

Unnuap qeqqaniit killilersuutit Narsami atuutilissapput.

Narsami tunillaassuuttoqarpoq, tuniluunnerullu pilerfia ilisimaneqarnani. Taamaattumillu Narsami aamma killilersuisoqalersoq, Namminersorlutik Oqartussat ilisimatitsipput.

Tassalu Narsami aqqaneq marlunniit qummut ukiullit ininut kikkunnit tamanit iserfigineqarsinnaasunukarunik covid-19-imut akiuussusersimanermut, siusinnerusukkut tunillanneqarsimanermut imaluunniit covid-19-mut misissorneqarsimanermut uppernarsaammik takutitsinissaq piumasaqaataalissaaq.

Taamatuttaaq aqqaneq-marluk qaangerlugit ukiullit tamarmik kikkunnit tamanit iserfigineqarsinnaasuni kikkunniillu tamanit ilaaffigineqarsinnaasuni ilaaniarunik qanermut assiaqut aamma kiinnamulluunniit assiaqut atussavaat.

Taavalu tamanit ornigarneqarsinnaasuni isersimasinnaasut amerlanerpaaffissalerneqassapput. Tassa imaappoq qatserisartut amerlanerpaaffiusinnaasutut akuerisaata affaannaat isertinneqarsinnaassapput.

Narsap saniatigut inoqarfiit killilersuiffiusut tassaapput: Ilulissat, Kangerlussuaq, Maniitsoq, Nuuk, Qasigiannguit, Upernavik, Tasiusaq, Upernavik Kujalleq, Nutaarmiut, Nuussuaq, Innaarsuit, Naajaat, Aappilattoq, Kangersuatsiaq, Kullorsuaq.