Malittarisassanik allannguineq pillugu tusagassiortunik nalunaaqutaq ataatsimut katersortitsineq
Nunatta Nakorsaaneqarfia, politimesteri Bjørn Tegner Bay kiisalu Naalakkersuisut tusagassiortunik nalunaaqutaq ataatsimut katersortitsissapput. Tassani malittarisassat pillugit saqqummiissapput.
Suulli allannguutaassanersut maannamut suli ilisimanngilagut.
Malittarisassat nunatsinni atuuttut februaarip ulluisa 14-iannut atuukkallarput. Tassalu tamanit ornigarneqarsinnaasunukarniaraanni coronapassimik takutitsisoqassaaq qanermut kiinnamullu assiaquteqartoqartassaaq.
Nunatsinni neriniartarfinnut imerniartarfinnullu qatserisartut amerlassusaasinnaasutut akuerisaasa affaannaat iseqqusaapput.
Imigassat Kommune Qeqertalimmi, Kommuneqarfik Sermersuumi Kommune Kujallermilu tuniniagaajunnaarallarnikuupput. Qeqqata Kommunianili imigassamik nioqquteqaqqusaannginneq unnuap-qeqqanut atorunnaarpoq.
Neriniartarfiit imerniartarfiillu ippassaq tikillugu unnukkut qulinut matusarput. Naliginnaasumilli ullumimiit ammasinnaanngorput.
Nunatsinni killilersuinerit - naatsumik
Nunatsinni tamarmi tamanit iserfigineqarsinnaasuni coronapas atuutissaaq.
Tassa neriniartarfinni, imerniartarfinni, filmertarfinni, katersortarfinnilu assigisaanilu.
Ukununnga isissaguit qanermut assiaquteqassaatit:
- Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- Bussinut taxanullu ilaanermi.
Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
Imigassamik nioqquteqarneq nunatsinni kommuninit tallimanit sisamani februaarip aallaqqaataanut imaluunniit ulluisa qulingiluaannut inerteqqutaagallarpoq.
15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit.
Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.
Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
Imigassanik Qeqqata Kommuniani tuniniaasinnaanngoqqittut
Imigassaarniarneq Kommune Qeqertalimmi, Kommuneqarfik Sermersuumi Kommune Kujallermilu februaarip ulluisa qulingiluaannut tuniniaaqqusaajunnaarallarnikuupput. Qeqqata Kommunianili imigassamik nioqquteqaqqusaannginneq unnuap-qeqqanut atorunnaarpoq.
Neriniartarfiit imerniartarfiillu ippassaq tikillugu unnukkut aqqannermut qiteqquttoq matusarput. Naliginnaasumilli ullumimiit ammasinnaanngorput.
Akiuussuserneqanngitsut 15-it sinnerlugit ukioqartut tamanit iserfigineqarsinnaasunut isersinnaatinneqassanngillat, taamaallaat taakkunani sulisussaagunik isersinnaassapput. Tassa akiuussuserneqarsimanermut uppernarsaat coronapas takutissavaat - imaluunniit tunillatsinnikuusimanerminnik uppernarsaateqassapput.
AAMMA ATUARUK Tamaat isigalugu: Coronavirus pillugu killiffik
Taamaammat coronapas nunatsinni killilersuutini nutaani qitiulluinnalerpoq. Neriniartarfinnut, imerniartarfinnut atuakkanilluunniit atorniartarfiliarniartut takutitsinngikkunik isersinnaassanngillat. Aamma naak angerlarsimaffimmi nammineq misissuummi tunillatsissimaneq uppernarsarneqarnikuugaluarpat tamanna coronapassimut atorsinnaassanngilaq.
Tuniluunnerujussuaq
Kalaallit Nunaanni Covid-19-imut killilersuutit eqqarsaatigalugit Naalagaaffeqatigiinniittut sinnerinit akerlianik iliuuseqartoqarpoq.
Danmarkimi Savalimmiunilu malittarisassanik sukaterinatik ammaassipput, kaammattuutillu malittarisassallu tamaasa unitsillugit, naak nunani taakkunani tunillaassuunnermi kisitsisit annertugaluartut.
Nunatsinni tunillatsissimasut amerlassusaat naatsorsorujuminaatsorujussuupput. Tassami inuit ikittuinnaat PCR-imik ukiup matuma aallartinnerani misissortissinnaalernikuummata.
Sinnerilu angerlassimaffimminni imminnut tunillatsisimanerlutik misissortut namminneerlutik peqqissinertik nakkutigisarpaat.
Nuna tamakkerlugu PCR-imik marlunngornermi misissortittut 54 procentii tunillatsissimasuupput.
- Tunillaatsittut suli amerliartorput, utoqqaat illuini, meeqqat atuarfiini suliffeqarfinnilu tunillatsissimasut suli amerlapput. Sumiiffiilli ilamininnguini tunillatsissimasut ikiliartortut takuneqarsinnaapput, Nunatta Nakorsaaneqarfia taama nalunaarpoq.
- Napparsimaveqarfinni sulisut suli nappaaluttut amerlapput.
Napparsimavinni ilaatigut coronamik tunillatsissimanertik pissutigalugu 13-it uninngapput. Nuummmi arfineq-marluk, Qaqortumi marluk, Ilulissani ataaseq, Sisimiuni ataaseq, Uummannami ataaseq Paamiunilu ataaseq uninngallutik.
