Mannannguaq paninilu Uiloq Kangaamiuni ullut 33-t saperngupput

Mannannguaq Mathæussen paninilu Uiloq Egede, sikoqarpallaarnera peqqutigalugu Kangaamiuni ullut 33-t saperngupput. Taassuma aapparmi ilaqutai tikeraarlugit Kangaamiuniipput.

Taakku taamarsuaq Kangaamiuniinnianngikkaluarput, tassami februaarip ulluisa 17-iani Maniitsukkoorlutik angerlamut aallartussaagaluarput.

Sikoqarpallaarnerali peqqutigalugu Disco Line Kangaamiunut tikissinnaanngilaq.

- Ulloq taanna siku peqqutaalluni kinguaattooratta, sisamanngorneq aallartussaagaluaratta ataasinngornermut kinguartikkamikku, ataasinngornermi paasiteqqippaatsigut ataasinngornermut aamma kinguarteqqittoq, taava sapaatip akunnerakkuutaarlugit kinguaattooqattaariarluta massakkut qaammat sinnerparput.  

Mannannguaq Mathæussen ukiaanerani aalisarlunilu piniartarpoq, ukiullu sinnera nunami suliffeqartarluni. Mannali qaammat sinnerlugu Nuummut utersinnaannginnini peqqutigalugu aningaasarsiorsinnaanngilaq. Taanna nuummi ineqarpoq qaammatit tamaasa akilertakkaminik.

AAMMA ATUARUK Johanne ernuttanilu angerlarniarlutik qaammat ataaseq sinnerlugu utaqqisut

Saperngunerata sivitsoriartornerani akiligassanut malinnaaniarnissani isumakuluutigigaluttuinnalerpai. Taamaammallu Kangaamiuni meeqqat atuarfiani vikaritut sulisalerpoq – akissarsialli akiligassanut matussusiinissamut naammanngillat.

- Kisianni ernumassutit arlalinngoriartuinnaramik, angerlarsimaffinnut akissaarukkiartuaarlunga, inuussutissagut annikillillutik, KNR-imut oqarpoq.

- Annikilliornarpoq. Ingammik Nuummut angerlarsinnaanani.

Maniitsup eqqaani ilungersunartorsiorneq

Kangaamiuni mittarfeqanngilaq, allarniaraanni taamaallaat angallatikkut aallartoqarsinnaavoq.

Mannannguaq Mathæussenitut Uiloq Egedetuulli Maniitsup pigisaani saperngusut arfineq marluusut Disko Linemi pisortaata, Nöelle Simoudip KNR-imut ilisimatitsissutigaa.

- Maniitsup pigisaani nunaqarfiit marluk mittarfeqannginnerat unammillernartunut peqqutaaqataapput. Tassa ilaasoqarsinnaanermut akuerisaasumik mittarfeqannginnamik.

Mannannguaq Mathæussenip ineqarnermut akiliisinnaaniassammat ullormusianik Disko Line tunniussivoq. Taassuma koruuninik qassinik ullormusiassanik tunineqarnini oqaatigerusunngilaa – Disko Linelli nittartagaa naapertorlugu angalanermi taamaatitsiinnartoqarnerani inersimasoq 400 koruuninik meerarlu 200 koruuninik ullormusiaqartinneqartarput.

Ilaquttani ilaginagit inuuissiortoq

Uiloq Egede februaarip ulluisa 25-ani inuuissiorpoq. Taassuma Nuummi ilaquttani ilagalugit ullorsioqatigiittussaagaluarput – tamannali piviusunngunngitsoorpoq.

- Kangaatsiami inuuissiortussanngornini aliasuutigisorujussuugaluarpaa. Kisianni aapparma ilaqutaasalu ullorsiorluartimmatigut nuannisarpugut, Mannannguaq oqarpoq.

Kangaamiuniit piffissaq qaninneq aallaqqinngitsuussagaluarussi qanoq issavisi?

- Naluara. Naammagittarpugut. Naammagittarniarsarivugut.