Mary Arcticap sikoqarpallaaneranik tulassinnaannginnera ilaqutariinnut sapigaqartuutilinnut eqquinerluttoq

Mary Arctica kitaani sikoqarpallaarnera peqqutigalugu, Aasiannut, Qasigiannguanut Ilulissanullu tulariarsinnaanngilaq.

Royal Arctic Line nittartakkamini sisamanngormat taama nalunaaruteqarpoq. Tamanna kinguneqarpoq Pisiffiup nioqqutissanik ilaatigut amigaateqalerneranik:

Iluliarmiup Nivi Heilmannip ernera marlunnik ukiulik sapigaqartuuvoq. Aalisakkat, manniit, qajuusat, qaqqortarissat immuillu saperlugit.

Nioqqutissanillu amigaateqartoqarnera taakkununnga eqquinerluppoq.

- Ernitta sapingaqarnera peqqutaalluni pisinnaasai killeqartorujussuugamik. Nerisinnaasai killeqareertigalutik pajuttaatip tikinngitsoorneranik aatsaat killeqarnerujussuanngorput, Nivi Heilmann oqarpoq.

Taassuma ernerata immuit saperamigit yoghurtit naatitaneersut pisarpai. Ilulissanili taakku maanna nungutersimapput.

- Immunnik sapigaqarami meqqit aalajangersimasut Alprot kisiisa pisinnaagamigit taakkuali pisiassaanatik. Naatitat aamma. Appelsinetorusukkaluarluni bananillu aamma tamaani soqarani. Pisiniarfinnut alakkarterigaluarluta soqanngerrakkamik.

Nuumi pisiniartitsisariaqartartut

Taakkuinnaanngitsut nungutersimapput. Ilaqutariit ulluinnarsiutaat aamma takussaanngillat.

- Ullaakkorsiussalluta qallersuutissarsiniaraluarpugut aamma. Qallersuutissalli nungorrassimapput aamma.

Nivi Heilmannip ernermi sapinngisaanik Ilulissani pissarsisinnaanngikkaangami Nuummi pisiniartitsisariaqartarpoq.

- Nuummi pisiniutseriarluta Nuumminngaanniik timmisartorluni Ilulissiartussamik ujaasivugut. Pisiniutseriarluta aqqutissarsiuukkaangatsigit qujanartumik nassaartarpugut. Nassaanngikkaangatta mittarfimmukaatsillugit akiliilluta nassiutsittarpagut, Nivi Heilmann oqarpoq.