Mette Frederiksen Nuummut tikippoq: Kalaallit Nunaanni pissutsit ilisimasaqarfiginerorusuppakka

Ministeriuneq Mette Frederiksen silap pissusia nunanullu allanut sillimaniarnermullu politikki pinerullugit nunatsinnut maanna tikeraarpoq.

-Tikeraarnissaraluara corona pissutigalugu arlaleriarluni kinguartittarnikuuvoq. Taamaammat maaniissinnaagama nuannaartorujussuuvunga. Silap pissusia nunanullu allanut sillimaniarnermullu politikki pinerullugit maaniippunga. Aamma meeraallutik misileraataasimasut utoqqatserfigineqarnerata aqagu malunnartinnissaanut peqataassaanga, ministeriuneq Mette Frederiksen oqarpoq.

Folketingimi amerlanerussuteqartut kunngeqarfimmi illersornissamut milliardilikkaanik atuinerunissamik marsip aallartisimatsiartoq isumaqatigiissuteqarput. Nunarpulli aalajangernermi ilaatinneqanngitsoq Naalakkersuisut siulittaasuat taamani oqarpoq.

Ministeriuneq paasisaqarnerorusuttoq

Tamannalu qanimut maanna oqallisigisussanngorpaat. Pitsaasumilli suleqatigiinnissartik ministeriunerup naatsorsuutigalugu KNR-imut oqarpoq.

- Neriuutigaara naatsorsuutigalugulu ataatsimoornerugutta paaseqatigiinnerulissasugut. Tassa naalagaaffeqatigiinnitsinni ilisarnaatissarput, nunaavugummi pingasut assigiinngilluinnartuulluta ataatsimoortut, tamaammallu immitsinnut naalaartarnissarput pisariaqarpoq. Paasisaqarnerunissarlu angorusullugu pillugu maaniippunga, Mette Frederiksen oqarpoq.

AAMMA ATUARUK Múte B. Egede kamattoq: Danskit sillimaniarnermut isumaqatigiissutaat pillugu ilisimasaqanngilagut

Naalakersuisut siulittaasuat tassunga aamma isumaqataavoq.

- Naatsorsuutigivara suleqatigiinneq pitsaasoq, aamma naligiimmik tunngaveqartoq malillugu sulissasugut ingerlariaqqissasugullu, Naalakkersuisut siulittaasuat Múte B. Egede ministeriunermik tikilluaqqusisoq oqarpoq.