Mimi Karlsen: Ilaqutariit toqqissisimasut asannittullu pilersinneqassapput

Meeqqanut, inuusuttunut, ilaqutariinnut peqqissutsimullu naalakkersuisup, Inuit Ataqatigiinneersup Mimi Karlsenip, ukioq nutaaq aallarnerlugu kommunini politikerit sulianillu isumaginnittut taavalu nuna tamakkerlugu politikerit isumasioqatigiisippai.

Nunatsinni ilaqutariit siunissami toqqissisimasumik, eqeersimaartumik asannittumillu inuuneqarnissaa taassuma anguniarpaa.

Paqumigisaasunik, soorlu persuttaasarnermik, imminut toquttoqartarneranik taavalu meeqqanik allanut inissiisarnermik ammanerusumik oqallisilernissaq siunertaavoq.

AAMMA ATUARUK Mimi Karlsen: Meeqqat angerlarsimaffimminni peroriartortut amerlanerussapput

- Pingaartutut isigigatsigu ilaqutariit toqqissisisimasut aammalu pilluartut angussagutsigit taava suliagut tassuuna annertuumik kivinniassallugit. Taamaammallu pingaartutut isigisimavarput ilaqutariinnut kikkunnulluunniit sullissisinnaasut taamatut ataatsimoortissallugit.

Kommuni Naamminersorlutillu oqartussat suleqatigiissasut

- Tassami uku politikerit aammalu ilaqutariinnik inunnillu sullissisuusut taamatut oqaloqatigiissinnaanermik aamma allaat paquminartunik oqaloqatigiissinnaanermik assigiinngitsutigut ilisimasaqarfigigutta taava ilaqutariit amerlanerusut ikiorsinnaajumallugit, Mimi Karlsen KNR-imut oqarpoq.

Isumasioqatigiinnikkut kommunit tamarmik Namminersorlutillu Oqartussat suleqatigiinnerat taassuma nukittorsarusuppaa.

- Ukua ilaqutariinnik aggersarneqarsimasut imaluunniit inunnik ataasiakkaanik sullissisut taakkua ilisimasanik kajuminnartunik sulinermut atortussanik pissarsissuluarsimanissaat, taamaalillutik ilaqutariit ataasiakkaat ikiortariaqartunik imaluunniit arlaatigut pisariaqartitsigunik ikiorserneqarnissaannik aamma ilisimasaqarniassammata, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen, KNR-imut oqarpoq.

AAMMA ATUARUK MIO-mit nersorneqartoq imminut toqunneq pillugu: Angutit uagut immaqa matoqqavallaarpugut

Isumasioqatigiisitsinermi meeqqat pisinnaatitaaffii pillugit sullissivimmit MIO-mit, suliniut Qamani pillugu saqqummiusissaaq.

Qamani suliniutaavoq MIO-mit inuusuttunik suleqateqarluni imminut toqunneq pinaveersaartinniarlugu suliaq. Inuusuttut imminut toqunneq qanoq pinaveersaartinneqarsinnaanersnik isummaminnik saqqummiussiviat.

Suliniummi tassani Lars Møller peqataavoq, taanna nammineq kajumissutsimini iminut toqunnissamik pinaveersaartitsinermik suliaqartuuvoq, isumasioqatigiisitsinermilu saqqummeeqataalluni.

Taakku saniatigut Ilisimatusarfimmi peqqissutsimut ilisimatusartoq, Naja Carina Stenholdt aamma saqqummiisussanut peqataassaaq.

Isumasioqatigiittut Nuummi Hotel Hans Egedemi januaarip qulingiluaniitt aqqarnanut napisimaarput.