Afghanistanimi ministereqarfiup eqqaani qaartartumeerisoqarmat toqutaasut ikinnerpaamik tallimaasut
Afghanistanip illoqarfiisa pingaarnersaanni Kabulimi nunanut allanut ministereqarfiup eqqaani ippassaq pingasunngornermi qaartartumeerisoqarmat inuit tallimanit ikinnerunngitsut toqutaapput 40-llu ikiligaallutik.
Afghanistanimi politiit pisumilu takunnittut nutaarsiassaqartitsivimmut Reutersimut taama oqarput.
Talibanimili naalakkersuisut oqaaseqartartuata oqaatigaa, ikinnerpaamik inuit 20-t toqutaasimasut.
Taakku aamma uppernarsaapput qaartartumeerineq imminuujutigaluni qaartartumeerinerusoq, qaartartumeerisorlu nunanut allanut ministereqarfimmut Kinamiut aallartitaannik pulaarfigineqartumut iserniarsarisimagaluartoq.
AAMMA ATUARUK Kabulimi moskémi qaartartumeerisoqarnerani toqutaasoqarlunilu ikiligaasoqartoq
Tusarfiit tutsuiginartut arlallit allapput, toqutaasut arlallit Talibanimiunut ilaasortaasut.
Islamit siusinnerusukkut arlalippassuariarlutik Talibaninut qaartartumeerisareersut ippassaq pingasunngornermi qaartartumeerisoqarneranut aamma pisuutitaapput.
Talibanimiut pissaaneq siorna aggustimi tigummassulli Afghanistanimi aningaasaqarneq paatsiveerusimaarsimasoq oqaatigineqarpoq.
Nunat arlallit, USA taakkununnga ilaalluni, milliardilikkaanik tapiissutiginiakkatut neriorsuutigisaminnik uninngatitsipput, nunallu allat tunissutigisartakkaminnik aamma ikilisaanikuullutik.
