Ministeriunerup oqalugiutaa: Naalakkersuisut siammasipput unammilligassarpassuaqarmat

Ministeriunerup Mette Frederiksenip (S) ukiortaami oqalugiaqqaarnermini aatsaat taamak naalakkersuisut siammasitsiginerisa patsisaa takkartorpaa.

Tamatumunngalu patsisaanerarlugu Ukrainemi sorsunneq, nukissiuteqarnikkut ajornartoorneq aammalu akit qaffannerujussuat aammalu erniat qaffanneri coronallu kingunerluuterpassui.

- Nuissertillugu taarnerulersarpoq taamaattoqartillugulu nukittoqatigiittariaqarpugut. Akiuussinnaalerluta ataatsimoornitsigullu neriuuteqarluta, ministeriuneq qullersaqarfimmi ippassaq unnukkut oqalugiarnermini ilaatigut taama oqarpoq.

- Danskit folketingimi katitertariaqarput siammasissumik suleqatigiittussanngorluta, tamannalu Danmarkimut pitsaasuuvoq.

- Sapinngisarput tamaat atorlugu nukittunerulerniartariaqarpugut, Danmarkimut toqqissimalissutaasussamik, Mette Frederiksen ippassaq unnukkut sapaammi Marienborgimi taama oqarpoq. 

Sapaatip-akunneri marluk qaangiupput Danmarkimi naalakkersuisoqatigiilersut pilersinneqarmata, novembarip aallaqqaataani qinersereernerup kingorna qinigaasuneersut. .

Oqaluttuarisaanermilu aatsaavissuaq Socialdemokraatit, Venstret aammalu Moderaterne naalakkersuisoqatigiilerput.

Naalakkersuisoqatigiilersut siunnersuutigaat amerlanerusut sulilersinneqartariaqartut aammalu kandidatimut ilinniakkat allannguiffigineqartariaqartut aammalu sapaassuit atorunnaarsinneqartariaqartut.

Ministeriunerulli nalunngilaa, sapaassuit atorunnaarsinneqassagaluarpata tamanna amerlasuunit iluarineqarnavianngitsoq.

- Europami sorsunneq, silap allanngoriartornera maanilu nunagisatsinni unammilligassat allat ataasiakkaarluta iliuuseqarnerunitsigut sunniuteqarfiginiarsarinngikkutsigit angusaqarsinnaanngilagut.

- Inuiaqatigiit inuuffigisagut ineriartortissinnaavagut taamaallaat tamatta allannguerusussuseqarnitsigut, taanna erseqqissaavoq.

Taassuma erseqqissaatigaa; silap allanngoriartorneranut aammalu illersornissamut isumannaallisaanermullu aningaasaliissuteqaqqissagunik Danmarkilu tamakkununnga siuttunngussappat  aaqqissuusseqqinnerit maanna pisariaqartut pingaartumik atugarissaarnerup tungaatigut.