Ministeriunerup Ruslandip Bornholmimut tunngatillugu mianersoqqussuteqarnera akuerinngikkaa

Amerikamiut Bornholmimi sakkutuuliisinnaanissaannut isumaqatigiissummut atatillugu russit mianersoqqussuteqarnerat ministeriunerup Mette Frederiksenip (S) akuersaarumanngilluinnarpaa.

Tamanna Rønnemi sakkutuut ineqarfiannut tikeraarnermini oqaatigaa.

- Tamanna naatsunnguamik akissuteqarfigisinnaavara. Bornhomimi susoqassanersoq russit aallartitaata akuliuffigissanngilaa, Mette Frederiksen oqarpoq.

Danskit naalakkersuisut sillimaniarnermut politikkimut tunngasumik USA-mik isumaqatigiissusiorniarnertik ukioq manna siusinnerusukkut nalunaarutigaat. Tamanna amerikamiut Danmarkimi sakkutuuliisinnaanissaannik kinguneqarsinnaavoq.

AAMMA ATUARUK Misissueqqissaartartoq: Ukrainemi sorsunneq IA-p Siumullu akornanni eqqissinermik pilersitsisoq

Amerikamiut Bornholmimi sakkutuuliinnginnissaannut Rusland Danmarkilu ersarissumik isumaqatigiissuteqartut, Ruslandip Danmarkimi aallartitaata ukioq manna februaarimi oqaatigaa.

Ruslandip aallartitaata Vladimir Barbinip Sorsunnersuup Aappaata kingorna isumaqatigiissut innersuussutigaa. Russit sorsunnersuup uninneranit ukiup ataatsip qaangiunnissaanut tassa 1946-mut qeqertamiiginnarput.

USA-mut qaninnerusumik suleqateqarneq

Danmark nunaasoq namminersortoq, ministeriunerup erseqqissaatigaa.

- Erseqqissaatigerusuppara, Rusland danskit sillimaniarnermut politikkianut akuliuttussanngimmat – aamma Bornholmimi susoqarneranut, Mette Frederiksen oqarpoq.

Ruslandip nunami sanilerisaminut Ukrainemut februaarip ulluisa 24-anni saassussinerata kingunerisaanik russit Ukrainemut sorsunnermi tapersersuisunut kinguneqartitsiniarlutik siorasaaruteqarput.

AAMMA ATUARUK Puto Kiviup asasaa Ukrainemut aallarpoq: Suli uumanersoq eqqarsaatigiuaannarpara

Ministeriunerulli Danmarkip amerikamiut sakkutuut Bornholmimiissinnaatissagunigit tamanna aaqqiagiinnginnissamut sakkortusiartortitsissutaassangatinngilaa.

- Naamik, taamaannavianngilaq. Amerikamiut qaninnerusumik suleqatigilernissaat kissaatigaarput.

- Amerikamiut qaninnerusumik suleqatiginissaannik kissaateqarutta taava tamanna Danmarkip sillimaniarneranut namminerlu illersornissamut piginnaasaqarnitsinnut sakkortusaaniarneruvoq, aammalu atlantikoq illugiillugu pitsanngorsaaniarnerulluni, Mette Frederiksen oqarpoq.