Misissueqqissaarneq: Franskit qinersineranni Le Pen Macron-imut nallersuussinnaavoq

Isumasiuinerit kingulliit takutippaat Marine Le Pen Frankrigip præsidentissaatut tullertut qinerneqarnissaminut perioarfissaqartoq.

Taamaattoq massakkut præsidentiusoq Emmanuel Macron Frankrigimi præsidentimut qaammatip matuma ingerlanerani qinersisoqarnissaanut atatillugu tapersersorteqarnerorpasippoq.

Qinersisoqangajalernerani misissueqqissaarnermi Franskit nutaarsiassaqartitsiviata AFP-p erseqqissarpaa takuneqarsinnaasut naapertorlugit le Pen qinersinermi aappassaarinermut anngutissasoq Macron-imut unammillerluni.

Frankrigimi præsidentimut qinersineq immikkoortunut marlunnut avinneqartarpoq, qinersinermi siullermi sapaat 10. apriilimi taaguunneqarnerpaat marluk kisimik immikkoortut aappaannut kingullermullu ingerlaqqissapput. Qinigassanngortituut sinneri qulit ingerlaqqissanngillat.

- Marine Le Pen ukiorpaalussuit ingerlaneranni partiini ataataminit kingornutani sakkortuumik talerpilliusoq nalinginnaasumik qinersisartunut akuerineqarsinnaasunngortinniarlugu tamaviaarsimavoq, AFP-mi Tom Barfield allappoq.

Erseqqissarpaa tamatumuuna Macron-ip qiterlernik taasisartorpassuarnit, qinigassanngortittumik ataatsimik tapersersuigajuttartunit, tapersersorneqarnissani tatigivallaassanngikkaa. 

Partii nutaamik atserlugu 

Taamaattumik Marine Le Pen siornatigut qinersinernit annertunerusumik periarfissaqarpoq, taakkunanimi nammineq ataatanilu aappassaaneerinermik annertuumik ajorsartaramik.

- Qineqqusaarnermi patajaatsutut saqqummertarneranut ukiut 11-t ingerlaneranni Front National-imi siuttuunermini isigineqarnerminik saamanerulersitsinera peqqutaavoq, Tom Barfield naliliivoq.

Ullumikkut partiip aqqa Front National-imiit Rassemblement National-imut (RN)-imut (Naalagaaffimmi Inuiaqatigiit Ataatsimoortut)-nut allanngorpoq. Jean-Marie Le Pen partiimik aallarniisoq 2015-imi anisitaavoq.

Marine Le Penip qineqqusaarnerup nalaani Frankrigimi inuuniutit nalingat pingaarnerutissimavai, aningaasammi pisissutissat naleerukkiartornerat ilutigalugu inuuniutit nalingat qineqqusaarutigissallugu pingaartissimavaa. Frankrigimulli nunassiniartut aningaasatigut ikiorserneqarsinnaannginnissaat, Frankrigillu nunassiniartunut matoqqatinneqarnissaa suli qineqqusaarutigiuarsinnarpaa. EU-llu Frankrigimi inatsisiliornermut akuuallaarunnaarnissaa Le Penip partiiata Rassemblement Nationalip aamma kissaatigaa.53-inik ukiullip Le Pen-ip aamma siuariaatigisimavaa talerpilliunerpaat annertuumik tv-mi akerleriissaarisartumit/oqallissaarisartumit sakortuumillu musliminut akerliusumit Eric Zemmour-imit sunnerneqarsimammata.

Isumasiuineq: Macron kinguariartorpoq 

Ipsos-imi isumasiuinermi pingasunngormat saqqummersinneqartumi Macron siullermeerinermi ajugaassangatineqarpoq qinersisartut 26,5 procentiannit taaguunneqarluni. Le Pen tullersortuussangatinneqarpoq 21,5 procentinit taaguunneqarluni. Ulloq 24. apriili aappassaaneerinermi qineqqusaartunit marluinnarnit taakkunannga peqataaffigineqartumi Macron 54 procentinit taaguunneqassangatinneqarpoq, taavalu Le Pen 46 procentinit.

Sapaatip akunneri marluk matuma siornatigut isumasiuinermut naleqqiullugu Macron-ip siullermeerinermut siuarsimanera affaannanngungajassimavoq, Ipsos-ip isumasiuinerata takutippaa.