Misissuineq nutaaq: Kalaallini sukkortut 7 procentii immikkuullarissumik sukkortuusut

Kalaallini sukkortut 7 procentii “Maturity-Onset Diabetes of the Young”-imik (MODY) taaguutilimmik nappaateqarput.

Inuunerissaavik Steno Kalaallit Nunaat, Københavns Universitet, Syddansk Universitet aamma Steno Diabetes Center Copenhagen suleqatigiillutik kalaallinik inersimasunik 4000-nit amerlanerusunik misissuineranni nutaajusumi tamanna erserpoq.

- Sukkortuni MODY-mik nappaatillit timaat sukkortut iluaqutaannik insulinaliorluartarput, insulinili aavannut akulerunneq ajorpoq, Inuunerissaavik Steno Kalaallit Nunaanni nakorsaaneq ilisimatoorlu taavalu missuinermi nutaajusumi siuttuusoq Marit Eika Jørgensen oqarpoq.

Nappaat immikkuullarissoq naggueqatigiit inuit akornanniinnaq nappaataasoq

Sukkornermik nappaatini allani arlallit MODY-mik aamma taaguuteqarput, taakkualu inuiaat allat akornanni aamma nappaataapput. Ilalisaatinili allannguut taanna naggueqatigiit inuit akornanniinnaq kingornuttagaasoq misissuinermi erserpoq. Sooq naggueqatigiit inuit kisimik taassuminnga nappaateqartarnersut, Marit Eika Jørgensenip oqaatigisinnaanngilaa.

- Naggueqatigiit inuit nunanit killerneersuninngarnit kangianeersuninngarnillu timikkut allatut sananeqaateqartut tusarnartarinngilarput. Tamanna Issittormiut ukiuni 20.000-nit ikinnerunngitsuni avinngarusimaqalutik inuusimanerannik Issittumilu silap pissusianut nerisaqarnerullu tungaatigut naleqqussarsimanerannik peqquteqarpoq, taanna oqarpoq.

Sukkornermik nappaatit MODY-mik taaguutillit allat inuiaat allat akornanni sukkortut 2 procentiisa akornanni naammattuugassaakkajupput, MODY-li naggueqatigiit inuit akornanniinnaq kingornuttagaasoq kalaallini sukkortut 7 procentiisa akornanni nappaataalluni. Taamaammat misissuinermi paasisat kalaallini sukkortunut qanoq nakorsaatissiisarnissamik misissuinissamut pingaaruteqarput, kukkusunimmi nakorsaaserneqarsimagaanni peruluutaasinnaasunik allanik nappaateqalissutaasinnaammat.

Nappaatip suussusianik kukkusumik aalajangiisoornaveersaarsinnaanngortut

Sukkortuni MODY-mik nappaatillit timaat insulinaliortarmata type diabetes 2-mik taaguutilimmik nappaateqarneraqqaarneqakkajupput.

Tassa kukkusumik nappaateqarnerakkajunneqartarput. Sukkortunili MODY-mik nappaatillit sukkornermik type 1 diabetesimik taaguutilimmik nappaatilittut nakorsaaserneqartussaanngillat.

Type 1 diabetes aamma type 2 diabetes suuppat?

Type 1 diabetesertut timaat insulinaliorunnaavittarput. Taamaammat aavisa sukkoqassusaannut nalimmassaammik, tassa insulinamik ullormut arlaleriarlutik nakorsaasertarput.

Type 2 diabetes utoqqaat nappaataannik aamma taaneqartarpoq, sukkornermillu taassuminnga nappaatillit timaat insulinalersinnaajunnaariartortarlutilluunniit insulinaliorunnaariartortarput.

Kalaallini immikkuullarissumik sukkortuusut insulinamik aqajaqqup siulequtaaneersumik arrortitsisinnaasunik, glimepiridinik, nakorsarneqarluarsinnaanerupput.

- Iisartakkat taakkua ukiut 15-20-t matuma siorna atugaasimaqisut maanna atugaarpianngillat. Immikkuullarissumilli sukkortunut nakorsaatissaqqipput.

Tassa MODY-mik nappaatillit immikkut nakorsaaserneqartussaammata, nappaatip taassuma kingornuttagaaneranut peqqutaasunik paasinninnerput pingaaqaaq, Marit Eika Jørgensen oqarpoq.

MODY kingornuttagaammat sukkortuni tassuminnga nappaatillit ilaquttatik sukkortut MODY-qarnermik misissortinnissaannut kajumissaarsinnaanngorpaat.

- Pitsaasumik eqqortumillu nakorsaaseeriaaseqarnissarput pingaarpoq, misissuinermilu paasisavut alloriaataapput, Marit Eika Jørgensen oqarpoq.