Misissuineq nutaaq: Qaqqat sisoorsinnaanerannut qajannartortallit arfineq-marluusut
Qaqqanik misissuinerup nutaat qaqqat sisoortoqarfiusinnaasut 19-it misissuiffigai, tassanngalu qaqqanit taakkunannga arfineq-marluk sisoortoqarfiunissaanut qajannartut inerniliissutigineqarpoq. Taamaammat naalakkersuisut alapernaarsuummik nutaamik atortuliissapput.
Aatsitassanut inatsiseqarnermullu naalakkersuisoqarfik tusagassiuutinut nalunaarummi paasissutissiivoq.
Danmarkimi Kalaallit Nunaannilu nunap qanoq issusianik misissuiffik (GEUS) Upalungaarsimaniarnermut Ataatsimiititaliarsuarlu misissuinermik suliaqartuupput.
Qaqqap sisoornissaanut aarlerinartoqartoq
Qaqqat arfineq-marluk sisoornissaata aarlerinaateqarneri assigiinngitsunut inissinneqarput: qaffasissumik, killilimmik, annikitsumillu.
Qaqqanit arfineq-marlunnit marluk sisoortoqarnissaanut aarlerinaataa qaffasippoq. Taakkulu tassaapput Karrat 3-mi Umiammakku Qaqqaat aamma Kangerluarsummi Kigarsimap kangianiittoq.
Qaqqat pingasut killilimmik aarlerinaateqarput. Taaakkulu tassaallutik Paatuut Kangilleq Sullorsuup avammut sineriaaniittoq, Illorsuaasaq Sullorsuup kujammut sineriaaniittoq kiisalu Qaarusuup Qaqqaa Nuup kangerluaniittoq.
Kingulliit marluk annikitsumik aarlerinaateqarput. Taakkulu tassaallutik Karrat 1 aamma Karrat 2 Umiammakku Qaqqaanniittoq.
Taakku annikitsumik aarlerinaateqarnerannut Illorsuit Nuugaatsiallu najugaqarfigineqannginneranik pissuteqarpoq.
Nakkutilliineq nutaaq
Aatsitassanut inatsiseqarnermullu naalakkersuisoqarfik 2022-mi aasakkut alapernaarsuinermut atortuliivoq. Taanna Karrat 3-mi Umiammakku Qaqqaanni qajannarnerpaap eqqaani inissisimavoq.
Nakkutilliinermut atortut 2023-mi nutarterneqassapput. Tamatuma saniatigut Kangerluarsummi Kigarsimami nakkutilliinermut aamma atortuliisoqassalluni.
Nakkutilliissutit qaqqani qajannartuni allanngoriartorneranut sunniuteqartunik paasissutissanik katersissapput.
Alapernaarsuinermut atortut ilimasaarinermut aamma/imaluunniit kalerrisaarinermut atortunngortinneqarsinnaanissaat naggataatigut siunertaavoq, taakkulu qaqqani piffissami qanittumi sisoortoqaratarsinnaaneranut ilimasaarisinnaassallutik, pisumik nalunaarsuisinnaassapput.
Innersuussutit allanngortinneqanngitsut
Misissuiffigineqartunut innersuussutit maanna atuuttut misissuinerup inerniissuteqarneranit allanngortinneqanngillat.
Innersuussut ataani allassimasoq Upalungaarsimaniarnermut ataatsimiititaliarsuarmit 2022-mi novembarip aqqarnani suliarineqarpoq:
- Massakkut suliniutigineqartut ingerlaqqissasut aamma upalungaarsimaneq pillugu suliamut ilisimasat pillugit naliliinerit, siusinnerusukkut Naalakkersuisunit tusaatissatut tiguneqarsimasut, aalajangiusimaneqaannarnissaat Upalungaarsimanermut ataatsimiititaliarsuup taamaammat innersuussutigaa.
Naalakkersuisut qaqqanit sisoortoqaratarnissaanut aarlerinartut, tassaarsuaqarsinnaanera kiisalu innuttaasunut nakkutilliinermut atortunik pilersitsinerup isumaa pillugit 2023-p ingerlanerani paasissutissiinermik ataatsimiititsinissat pilersaarutigaat.
