Mittarfiit meeqqallu borgmesterit ukiortaamut oqalugiaataanni ilaasut
2022 aallartippoq, borgmesterillu tallimat tassunga atatillugu ukiortaami oqalugiaateqarput.
Borgmesterit oqalugiaatiminni assigiinngutsinik soorunami sammisaqarput, avannaani kujataanilu mittarfissat nutaat oqalugiaatini sammineqarput.
- Ukiumi qaangiuttumi nuannaarutaasunut ilaavoq kommunitsinni nutaamik Qaqortumi mittarfittaarnissarput. Innuttaasunik suliffeqarfinniit kommunitsinniillu annertuumik isumalluarfigineqartoq, Kommune Kujallermi borgmesteri Stine Egede, Inuit Ataqatigiinneersoq ukiortaami oqalugiarnermini oqarpoq.
Assi: Avannaata Kommunia
Avannaata Kommuniani borgmesteri Palle Jerimiassen Ilulissani mittarfittaartoqarnissaanut aamma qilanaarpoq:
- Mittarfik nammineerluni asfaltiinnaavoq, mittarfittaalu kisimi takornarianik suliffeqarfinnillu pilersitsinavianngilaq. Avataani suliffeqarfiit mittarfimmut attuumasunik sullissisut amerlasuujulluta attuumassuteqarfigisussaavagut. Tamannalu kommunalbestyrelsimi sinaakkusersussavarput tamanut iluaqutaasussanngorlugu, Palle Jerimiassen oqarpoq.
Assi: Qeqqata Kommunia
Kangerlussuullu puigorneqarnissaa, Qeqqata Kommuniani borgmesterip Malik Berthelsenip ernumassutigaa.
- Nunatsinni mittarfiit takinersaat pioreersoq, silallu pissusaa eqqarsaatigalugu nunatsinni isumannaannerpaaq, kisiartaalluni Sermersuarmut busserluni takornariarfiusinnaasoq, Issittumi ilisimatusarnermi aningaasarsiorfigissallugu periarfissagissaartoq ilumoortumik politikkikkut aningaasarsiornerulernissamik anguniagaqarnermi avaqqunneqarsinnaasussaanngikkaluarpoq, Malik Berthelsen oqarpoq.
Kulturerput pillugu atuartitsisalernissaq
Borgmesterit oqaluaagiaataanni meeqqat inuusuttullu aamma sammineqangaatsiarput.
Ulluunerani paaqqinnittarfiit pitsanngorsarnissaat matumani pinaveersaartitsinerit ungasianiillu atuartitsinerit pitsaanerulernissaat borgmesterit ilaatigut neriorsuutigaat.
Assi: Kommuneqarfik Sermersooq
Kommuneqarfik Sermersuumi borgmesterip, Charlotte Ludvigsenip IA-meersup meeqqat kalaallisut kulturerput pillugu ilisimasaqarnerunissaat sulissutiginiarpaa.
- Taamaattumik ukiuni sisamani tulliuttuni sulinissatsinni aamma annertusaaffigineqarnissaanut ilaalluni, Charlotte Ludvigsen ukiortaamut oqalugiaammini oqarpoq.
Foto: Kommune Qeqertalik
Ludvigsenip parteeqataata Kommune Qeqertalimmi borgmesterip, Ane Hansenip Namminersorlutik Oqartussat isumaginninnermik suliaqartunik pikkorissunik tigoqqaajunnaaqqullugit toqqaannartumik oqariartuuteqarpoq.
- Meeqqat inuusuttuaqqallu pitsaasumik sullinneqarnissaat angujumallugu kommunini tamani sulisunik ilinniarluarsimasunik amigaateqarpugut. Isumaginninnermi sulisugut pitsaasut naalakkersuisoqarfinnut ukiuni kingullerni katersuullutik allaffinni amerligaluttuinnarput, Ane Hansen oqarpoq, nangillunilu:
- Piffissarlu manna iluatsillugu naalakkersuisunut kissaatigerusuppara sulisut amigaatigeqisagut allaffinni katersornagit sinerissamut siammarterneqassasut. Inuit tikillugit sulisussatut pisariaqarteqaagut.
Borgmesterit tamarmik oqalugiaataat uani isiginnaarneqarsinnaapput.
