Naalakkersuisoqarfik qaqqat qajannartut eqqaanni nakkutiginninnermik pilersitsiniartoq
Karrat Kangerluani qaqqaq qajannartoq nakkutiginniffiussaaq, tamanna kingusinnerusukkut ilimasaarinermut kalerrisaarinermullu atorneqarsinnaanngorsinnaavoq.
Aatsitassanut inatsiseqarnermullu naalakkersuisoqarfik tusagassiuutinut nalunaarummi allappoq.
Nakkutilliissut ineriartortinneqarpoq, atortorissaarutillu assigiinngitsut Karrat Kangerluani aasamut pilersinneqassapput.
Ilimasaarinermut karrisaarinermullu atortorissaarutit sukkanerpaamik atulersinneqarnissaat sulissutigineqarpoq, naalakkersuisoqarfiulli tamanna qaqugu piariissanersoq oqaatigisinnaanngilaa. Naalakkersuisoqarfiup Uummannap eqqaani innuttaasut ingerlaavartumik paasissutissiissuteqarfigalugullu peqataatinniarpai.
Tassaarsuaqarneranut takussutissat nalinginnaasut
Sumiiffinni tamani tassaarsuartoqarneranik aarlerisaarisoqartillugu aarlerisaarinerit ilumoorunneqartassapput. Tassaarsuaq sineriammut apuuppat imaq nalinginnaasumit tininnerujussuussaaq imaluunniit imaq annertoorujussuarmik ulissaaq.
Soorluttaaq taamatut pisoqarnerani qimmit eqqissiveerussinnaasartut. Taamatut aarlerinartumik malussarniaraanni piaartumik sissaq qimanneqartariaqarpoq. Nalinginnaasumik sissamit qummut qatsissumukarlutit ingerlasassaatit. Meterit qullarterfitit tamaasa annassutigisinnaavatit.
Paasissutissarsiffik: Namminersorlutik Oqartussat
Kangerlummi qaqqat qajannartut pingasuupput. Taakku qaqqamut 2017-imi nunaqarfinnut Illorsuarnut Nuugaatsiamullu tassaarsuaqartitsisumut qanittumiipput.
Aatsitassanut inatsiseqarnermullu naalakkersuisoqarfiup oqarnera naapertorlugu ”nunap sajunneranik aammalu qaqqat sisoortarnerinik nakkutiginninnerup iluani immikkut ilisimasallit pikkorissut uani suliami suleqatigineqarput.”
Naalakkersuisoqarfik nakkutilliissummik ineriartortitsinermut ukioq manna 4,4 millionit koruunit atorpai, aappaagulu 4,9 millionit koruunit aamma atussallugit.
"Kigarsima" ilanngunniaraat
Uummannap eqqaani qaqqamik qajannartumik nutaamik nassaartoqartoq Namminersorlutik Oqartussat sapaatip akunnerata siuliani nalunaarutigaat.
Taanna Karrat Kangerluanit kujammut 45 kilometerinik ungasitsigisumi Kangerluarsummiippoq, taannalu ”Kigarsima”-mik taaguuserneqarpoq.
Aatsitassanut inatsiseqarnermullu naalakkersuisoqarfiup Karrat Kangerluani nakkutilliissummik pilersitsinissamik suliaqarnermut ”Kigarsima” ilanngunneqassasoq nassuiaatigaa. Karrak Kangerluanili suliaqarnerup assinga Kangerluarsummut nuuginnarneqarsinnaannginnerarpaa.
- Qaqqamik nakkutiginninneq pilersinniarneqartoq Kalaallit Nunaanni nakkutiginninnermi siullersaassaaq. Ajoraluartumillu atortunik piareeriikkanik pisiinnartoqarsinnaanngilaq, sumiiffinnullu assigiinngitsunut ilioraaginnartoqarsinnaanani, naalakkersuisoqarfik allappoq, nangillunilu:
- Sumiiffiit tamarmik nakkutiginninnermut maluginiutinik naleqquttunik naliliiffigineqaqqaartariaqarput, taamaattumillu nakkutiginninnermi periuseq ataaseq sumiiffimmit sumiiffimmut assilillugu ikkussorneqarsinnaanngilaq.
Kangerluarsummi qaqqaq qajannartoq paasineqartoq nutaaq ujarassiuut oqarnerat naapertorlugu ukiut qulit kingulliit ingerlanerani sukkasoorujussuarmik ineriartorsimavoq. Qaqqalli sisooratarsinnaanera qaqugu pisinnaanersoq qulakkeerlugu nalilerneqarsinnaanngilaq.
