Naalakkersuisut aqerloq aalisarnermut atortuni tamani inerteqqutaalertikkusukkaat

- Eqqarsarnarpoq. Ullumikkut oqaannaraanni suut tamarmik kittoraasat qaqinneqartarmata, Andreas Petersen KNR-mut oqarpoq. Taassuma aqerlut ningittakkaminut kiversaatitut atugarai.

Avatangiisinik mingutitsineq ukiuni kingullerni eqqumaffigineqaleraluttuinnarpoq. Plasktikkit ataasiaannarlugit atortakkat, mingutitseqisut, arlalinnit atorumaneerupput.

Naalakkersuisut aqerloq aalisarnermi atortuni tamani maanna inerteqqutaalersikkusuppaat. Tassa aqerlutalimmik eqqussineq, pigisaqarneq, atuineq tuniniaanerlu inatsisitigut periarfissaajunnaarsikkusuppaat.

- Imartatta mingutsikkiartuaarneqarnera unittariaqarmat. Tassuunakkut mingutitsineq aamma annertummat, avatangiisinut naalakkersuisoq, Kalistat Lund KNR-mut oqarpoq.

Taassuma aqerlutallit inerteqqutaalernissaat tamanut ukiaq tusarniutigaa.

Toqunartoq

Aqerloq saviminissaavoq oqimaatsoq, qituttoq toqunartulik. Pinngortitami arrortinneqarsinnaanngitsoq.

Aqerlulinnillu nerineq peqqissutsimut pitsaanngitsumik sunniuteqarsinnaavoq.

Nittartakkap peqqinnissamut tunngasup, Sundhed.dk-p allaaserisaa naapertorlugu aqerlumik toqunartuninneq patip, sianiutit, tiguit, tartup, qinersit, kinguaassiorsinnaasutsip, naartullu ajoqusernerannik kinguneqarsinnaavoq.

Saviminissaq taanna aalisarnermut atortuni soorlu, ningittakkanut kiversaatitut, akkersani qassutillu kivisinniarlugit ujarattaanniittarpoq.

Aqerlup aalisanermi atortutut inerteqqutaaleriartornera sivisusaaq. Naalakkersuisummi ukiuni pingasuni atorunnaarsitsiartuaarusupput. Tassa aqerlutalinnik tuniniaaneq 2025-mi juunip aallaqqaataanniit inerteqqutaalertikkusuppaat, atortunillu aqerlutalinnik atuinissaq pigisaqarnissarlu 2026-miit aamma inerteqqutaalersikkusullugu.

Tapersiisoq

Aalisartup allap, aqerlut ningittakkamini kiversaatitut aamma atugarai. Taassuma aqerlut aalajangerfeqarmata iluareqai mingutitsinerallu ilisimagamiuk Naalakkersuisut siunnerfiat ajorinngilaa.

- Tunngaviatigut ajunngilaq. Iluartorujuugaluarput, Hans G. Rasmussen oqarpoq.

Aqelutalinnik atuineq inerteqqutaalerpat unioqqutitsineq akiligassinneqartassaaq. Unioqqutitsisoqannginnissaa kommunalbestyrelsip nakkutigissavaa.