Pinaveersaartitsinermut periusissaq kinguartittoq: Inuusuttut ilanngunneqartariaqarput
Imminut toqunnissamik pinaveersaartitsinermut periusissamik saqqummiinissaq kinguartippoq.
Inuusuttut periusissiornermi ilanngunneqannginnerat peqqutaasoq, naalakkersuisut nalunaarput.
Meeqqanut, inuusuttunut ilaqutariinnullu naalakkersuisoq Mimi Karlsen (IA) taavalu meeqqat pillugit oqaaseqartartoq Meeqqat Inuusuttullu Oqaloqatiginnittarfianneersoq tassa MIO-meersoq, Aviâja Egede Lynge, qaammatip matuma aallartinnerani ataatsimiikkamik periusissap taassuma saqqummersinnissaa kinguartinneqassasoq isumaqatigiipput.
Imminut toqunnissamik pinaveersaartitsinermut periusissiaq kingulleq 2019-imi atorunnaarpoq. Periusissartaassarlu upernaaq manna piareerneqareersimasussaagaluarpoq.
Tamannali kinguartinneqartariaqarsimavoq.
Ikiortariaqarpit?
Imminut toqunnissamik eqqarsaateqaruit kisimiittutulluunniit misigiguit Tusaanngamut 801180-imut sianerlutit 1899-imulluunniit sms-erlutit saaffiginnissinnaavutit.
Tusaanngamut sianerneq sms-ernerluunniit akeqanngilaq, kinaanerlu taasariaqarani.
Tusaannga pillugu uani paasisaqarnerusinnaavutit.
- Suliniummi Qamanimi inuusuttut oqariartuutaat periusissami ilaanissaat uannut pingaaruteqartorujussuuvoq, Mimi Karlsen oqarpoq.
Siorna imminut toqussimasut 49-sut
Inuusuttut imminut toqunnissamik pinaveersaartitsineq pillugu innersuussutaat MIO-p, suliniutaanut Qamanimut ilanngunneqarput.
Naalakkersuisup oqarnera naapertorlugu nunatsinni siorna tassa 2021-imi imminut toqussimasut 49-pput imminullu toqunnissamik eqqarsaateqarsimasut 1309-upput.
- Inuusuttorpassuit kisitsisini taakkunani ajoraluartumik ilaapput, tusarnaanngikkutsigillu kisitsisit imminut toqunnermut tunngasut ikilisinnissaannut iluatsitsinavianngilagut, Mimi Karlsen oqarpoq.
Meeqqat pillugit oqaaseqartartup taamaaliortoqarnera nuannaarutigigaa
MIO-mit innersuussutit ilanngunneqartussanngornerat, meeqqat pillugit oqaaseqartartup, Aviâja Egede Lyngep, soorunami nuannaarutigaa.
- Inuusuttut sinnerlugit qujamasoqaanga. Taamaattussaammammi. Ukiuni arlalinngortuni pineqartut ilanngutitissagivut oqariartuutigisarsimavara. Aatsaat siullerpaamik inuusuttut namminneq innersuussutaannik ilanngussisimasumik imminut toqunnissamik pinaveersaartitsinermut periusissaqalissaagut, Aviâja Egede Lynge oqarpoq.
Inuusuttut aatsaat taamak periusissami peqataatinneqartigissasut, Naalakkersuisut nittartakkaminni paasissutissiipput.
- Inuusuttut ilanngutitittussaatitaaginnarnatik aammali taakkuupput anniaatip sumiinneranik pisariaqartitamilu suunerannik nalunnginnittut, uagullu inersimasuusugut qanoq tapersersussanerivut, ikiussanerivut neriuuteqalerseqqillugillu, meeqqat pillugit oqaaseqartartoq oqarpoq.
Suliniut Qamani MIO-p Nuummi Katuami septembarip 26-ani saqqummiutissavaa. Tassungalu atatillugu filmiliaq Katuap inersuaani takuteqqaarneqassaaq, nipilersortoqassaaq apeqqarissaarnertalimmillu oqallittoqassaaq.
