Naalakkersuisut vatpindinik, milluaatinik plastikkinillu puusiat tigummiveqanngitsut inerteqqutigilerniaraat
Puussiat plastikkit tigummiveqanngitsut, vatpindit, milluaatit, nerinermi atortut saattut.
Taakku inerteqqutaassasut, Naalakkersuisut isumaqarput, taakkulu siunnersuut tamanut tusarniaassutigaat.
- Pinngortitaq minguitsoq tassaavoq inuunermut peqqinnartumut tunngavissaq. Ajoraluartumik plastikkimik mingutsitsinerup akornutaasup alliartortuunera takusinnaavarput, tamatumalu pinngortitarput, uumasut peqqissuserlu sunniuteqarfigai, Nunalerinermut, Imminut Pilersornermut, Nukissiuutinut Avatangiisinullu Naalakkersuisoq, Kalistat Lund (IA) oqarpoq.
AAMMA ATUARUK Plastikkit ataasiaannagassat pitsaasuunngillat: Naalakkersuisut inerteqquteqalerusupput
- Nunatsinni pinngortitami plastikkit pingaarnerusumik sumiiffinnit najugaqarfinneersuunerat misissuinerit takutippaat – taamaattumik Kalaallit Nunaanni plastikkimik atugaqarnerup annikillisinnissaanut iliuutsit piviusut aallartisaavigissallutigit pingaaruteqarluinnarpoq.
- Puussianik plastikkinik nioqquteqarneq nunatta karsiata isaatitsissutigisarpaa.
- Tamanna puussiat plastikkit avatangiisinut akitsuuteqarnerannik pissuteqarpoq. Taamaammat puussiat plastikkit tigummiveqanngitsut tunineqaraangata nunatta karsia 3 koruuninnattarpoq.
- Aningaasaqarnermut Naalakkersuisoqarfik naapertorlugu puussianit avatangiisinut akitsuutit 11,5 millionit koruuninik siorna iluanaarutigineqarput.
- Nunatsinni pisiarfiit annersaasa, Brugsenip, KNI-p Pisiffiullu puussiat plastikkiusut ataatsimut 2,8 millionit tunivaat.
Naalakkersuisut ataasiaannarlugit atortakkat ukiumut 10,5 tonsit missaanniittut nunatsinnut eqqunneqartartut missiliorpaat.
Tamatuma saniatigut plastikkinik nioqqutissiat allat – pingaartumik puussiat plastikkit eqqorsorneqartartut 68 tonsit missaanniissangatinneqarput.
- Inerteqquteqarneq inuiaqatigiinni ileqqorisamik allanngortitsinermik aqqutissiuusseqataassaaq, taamaalilluni ataasiaannarlugit atortakkat plastikkinik tunisassianut taarsiullugit allanik qinigassanik atugaqartoqalissalluni, Kalistat Lund oqarpoq.
- Inuiaqatigiinni annertusiartortumik avatangiisinik sianiginninnermik, aammalu plastikkinut nalunaarummi siunnersuutigineqartut piviusunik minguitsumut pilersitsissutit atugaalersinnissaannut innuttaasunit aamma atugassanik pisiniarfinnit tapersersuinermik misigisaqarneq nuannaartunarpoq.
Plastikkit ataasiaannarlugit atortakkat pisiniarfinni pisiassaajunnaarnissaannik pilersaaruteqartoq, Kalistat Lundip oqarnera naapertorlugu taassuma parteeqataata Mimi Karlsenip Inatsisartuni 2019-imi siunnersuutiginikuuaa.
Naalakkersuisuusimasut aamma inerteqquteqarnissaq sulissutiginikuuaat.
Maline Jakobsenillu Nuummeersup tamanna ajunngilluinnartuusoraa.
Assi: KNR
- Uanga nammineq plastikkinik atuisarninnik annikilliingaatsiarnikuuvunga, taanna oqarpoq.
Assi: KNR
- Ajunngilluinnarpoq. Kisianni orpinnik nioqqutissiat sungiunniagassaassapput, Mari Jermiassen oqarpoq.
Assi: KNR
- Inerteqqutaalissappata ajorinngilara. Mingutsitsisarpummi. Uanga nammineq atorneq ajorpakka. Kaffilleraangatta errortakkat kisimik aamma atortarpagut, Sika Nathansen oqarpoq.
Siunnersuut politikkikkut akuerineqassappat oktobarip aallaqqaataani atuutilersinneqassaaq.
Tamanut tusarniaasoqareerpat inatsisissatut siunnersuut allanneqassaaq – tamatumalu kingorna Inatsisartuni ukiakkut oqallisigineqassalluni.
AAMMA ATUARUK Politikeri puussiat plastikit tunineqarnerat pillugu: Tupaallannaq
Plastikkilli saattut tigummiveqanngitsut ilaat ilaatinneqanngillat. Tassa taakku eqqiluisaarnermut atorneqartuuppata inerteqquteqarnermi ilaatinneqassanngillat.
Tamatuma saniatigut nakorsat peqqissaasullu vatpindinik milluaatinillu nakorsaanermut atugaqartut atuiinnarsinnaassapput.
Tusarniaanermut akissut Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfimmut maajip ulluisa 27-at nal. 12.00 nallertinnagu nassiunneqarsimassaaq. Tusarniaanermut akissut Naalakkersuisoqarfiup emailianut pan@nanoq.gl-imut nassiuteqquneqarpoq.
