Nammineq kajumissutsiminnik ikiuuttut Issittumi Sakkutooqarfillu ulapittut: Inuusuttut umiatsiamik orsueruttut
Narsamit namminneq kajumissutsiminnik ikiuuttut namminneq umiatsiaminnik umiatsiamillu pullattakkamik inuusuttoq ikinngutaalu pingasut ippassaq ujaaraat. Issittumi Sakkutooqarfik aamma ujaaseqataavoq.
Kalaallit Nunaanni Politiit taama nalunaaruteqarput. Inuusuttuaraq ikinngutaalu pingasut Narsarsuarmiit Narsap tungaanut ippassaq ualikkut marluk eqqani aallarput.
Aqqut taanna akunnernik arlalippassuarnik nalinginnaasumik sivisussuseqarneq ajorpoq. Nalunaaqutarli 23.21-nngortoq niviarsiaqqap angutaa ernumalerluni Kalaallit Nunaanni Politiinut attaveqarpoq. Taassuma panini oqarasuaatikkut attavigisinnaanngilaa. Taakkulu arlaannaalluunniit VHF-radiomik allamilluunniit attaveqaataasinnaasumik peqarani.
Taamaammat taakku sumiinnerat paasiuminaappoq, Kalaallit Nunaanni Politiit paasissutissiipput. Taamaammat nammineq kajumissutsiminnik umiatsiaminnik umiatsimillu pullattakkamik ujaaseqataasut Issittumi Sakkutooqarfimmiillu umiarsuup alapernaarsuutip Ejnar Mikkelsenip ujaasiffigisaat annertuvoq.
Ilaqutaasut Narsamukaartut
Qaqortumi politiit angallatertik ujaaseqataatikkiartorpaat. Politiillu oqarnerat naapertorlugu inuusuttut umiatsiaaqqamiittut ajunngitsut nalunaaqutaq 04.09 nassaarineqarput.
Taakku Narsamut ilaqutaannukaanneqarput.
Inuusuttut orsuerussimasut paasineqarput, taakkulu VHF-radiomik allamilluunniit attaveqaataasinnaasumik atortorissaaruteqannginnamik ikiortissarsiorsinnaasimanngillat.
- Ajornerujussuarmik pisoqarsinnaagaluarpoq, politikommissær Bjørn Bjerregaard tusagassiuutinut nalunaarummi allappoq.
Kalaallit Nunaanni Politiit angalasussanut siunnersuutitsialaqarput:
- Attaveqarnissamut atortorissaarutinik atorsinnaasunik: VHF-imik, oqarasuaammik qaammataasatigoortumik, GPS-imut atortorissaarummik orsussamillu naammattumik nassartuaannaritsi.
- Aamma nerisassanik minnerunngitsumillu oqortunik pissamaatinillu nassartaritsi: Puttaqutit/annanniutit aamma qaammartartut, ajunaalernermi ikumatittagaq, taamaalillutik taartumi takuneqarsinnaaniassagavit.
- Aallannginninni silasioqqaarit. Qanigisatit, ikinngutitit ilisarisimasatilluunniit qaqugu aallassanerlutik, aqqut suna atorniarnerlu pilersaarnerlutik qaqugulu uteqqinnissaq naatsorsuutiginerlugu ilisimatittuaannakkit.
