Namminneq kajumissutsiminnik ikiuuttut Peerstaat ujaaraat: Tammartoqaraangat attortisimanarpoq
Peerstaat Isaksen, 35-nik ukiulik, Qaqortumi kingullermik ullut qulingiluat matuma siorna takuneqarpoq.
Politiit, qatserisartut kiisalu Issittumi Sakkutooqarfimmeersut tallimanngormalli ujaasilerput. Arnarli taanna taamanili takuneqarsimanngilaq.
Peerstaat Isaksen imatut ilisarnaateqarpoq:
- 35-nik ukioqarpoq
- 155 centimeterit missaanni angitigaaq
- Nerinnartuuvoq.
Qorsummik taartumik jakkeqarpoq, aappilarujuttumik tuluujuaraqarpoq, qernertumik qarleqarpoq, tunguusanillu skooqarluni.
Taamaammat paasissutissanik nutaanik tusartoqarnissaata tungaanut ujaasineq unitsinneqarallarpoq.
Qaqortumi namminneq kajumissutsiminnik ikiuuttut aalajangerput ujaasinertik nanginniarlugu. Taakkua ippassaq pilersaarusiorlutik ataatsimiipput, taamatut Sofie Rosa Jakobsen oqarpoq.
AAMMA ATUARUK Arnaq 35-nik ukiulik suli Qaqortumi maqaasineqarpoq: Politiit paasissutissanik amerlanerusunik perusuttut
- Piffissap taama sivikitsigisup ingerlanerani inunnik tammartoqartarnera eqqumiigaara. Tammaaneqartut nanineqarsinnaanngikkaangata attortisimanartarpoq, taanna oqarpoq.
Taakkualu aatsaat namminneq kajumissutsiminnik iliuuseqalinngillat.
- Ukiut marluk matuma siorna aamma amerlaqaluta ujarleqataavugut, Sofie Rosa Jakobsen oqarpoq.
Ass.: Jørgen Simionsen, Sofie Rosa Jakobsen Peerstat Isaksen-imik ujarleqataavoq.
Inuit ujarleqqullugit politiit kaammattuipput
Arfininngormat Qaqortormiut illuaqqani, naqqup-iluini biilinilu Peerstaat isaksen-imik ujarleqqullugit politiit kaammattuipput.
Taannami aalajangersimasumik angerlarsimaffeqannginnami ilaatigut ikinngutimini ilaquttaminilu unnuisarpoq.
Taamaammat arlaanni inoqarneq ajortumiilluarsinnaavoq.
AAMMA ATUARUK Politiit arnaq 35-nik ukiulik Qaqortumi ujaarigaat
Taamatut kaammattuineq namminneq kajumissutsiminnik ikiuukkusuttut qisuariarfigalugu taaq silarlullu unammillerpaat.
- Maanna taarsiaartalerpoq. Namminneq kajumissutsiminnik ujarleqataasut isumannaatsumik ujarlernissaat nalorninartorsiutigilaarparput.
- Illoqarfiup iluani ujarlerniarpugut, aammali tasersuup sinaa qaqqallu ujarlerfissaallutik. Ukiulli taamaalinerani navianarsinnaammat mianersortariaqarpugut.
