Nipilersoqatigiit Sume pillugit piviusulersaarut danskit alutorsaatigigaat
DANMARK: Pivisiulersaarut "Sume - Mumisitsinerup nipaa" Nunatsinni iluatsilluartumik takutinneqareerluni danskit filmertarfiini ullumikkut takuteqqaarneqartussaavoq. Ullumikkullu takuteqqaarneqarnerani danskit filminik naliliisartuinik nersualaarneqavissorpoq.
Danmarkimi aviisit ullormut saqqummersartut anginerit tallimaasut piviusulersaarut ullorissanit arfinilinnit sisamanik-tallimanik nalilerpaat.
Nipilersoqatigiit ilaatigut "Nipilersorneq sakkugalugu sorsuuttartutut", "Naalakkersuinikkut Sapiitsuliortorsuartut" aamma "Kalaallit Nunaata Gasoliniisut" taagorneqarput, Danmarkillu nunasiaatilittut naqisimanninneranik kalaallinullu naalagarsuartut inissisimasimaneranik oqaasertaliisutut danskit atuartartuinit taaneqarput.
Naliliisartoq: Filmi isiginnaarlugu kiinaannguusaarnarpoq
Danskit naliliisartuisa arlallit oqaatigaat, danskit filmertarfimmut isiginnaariat filmimik isiginnaarnertik kiinaanngusaarnartikkaat: Danmarkip nunasiaatilittut inissisimanera aammalu inuiaqatigiit kalaallit kulturiannik arsaarneqarsimaneri pissutigalugit. Aamma Kalaallit Nunaata oqaluttuassartaa tamakkerlugu ilisimasaqarfiginnginnera kiinnaannguusaarnartippaat.
Metroxpressip naliliisartua ima allappoq: “Assilisat ilaat takullugit qiasunnguummernarput, naak Kalaallit Nunaat nunap assingatiguinnaq takusimagaluarlugu.”
Informationillu naliliisartua allappoq: “”Sume - mumisitsinerup nipaa’ maani naalagaaffimmi nunasiaateqarsimasumi atuartitsissutitut atorneqartariaqaraluarpoq. Amerlaqaagummi qanoq iliortoqartarsimanitsinnik ilisimaqanngitsugut. Kalaallit Nunaannik atugartuunngorsaanitta qanoq annertutigisimanera naluarput.’”
Naliliisartulli ataasiakkaat isumaqarput Kalaallit Nunaanni naalakkersuinikkut oqaluttuarisaanerup paasilluarnissaanut nipilersoqatigiit Sume avissaarnerisa kingorna qanoq pisoqarsimaneranik filmi amigaateqalaartoq.
Nuusiaasa saqqummerseqqinnissaat kissaatigigaat
Naliliisartullu isumaqatigiissutigaat matumani Kalaallit Nunaanni kulturikkut kingornussassaq filminngortinneqarsimasoq.
Informationillu aamma Ekstra Bladetip nipilersoqatigiit Sume nuusiaat nalitsinnut naleqquttumik nipigissarlugit saqqummerseqqinnissaat kajumissaarutigaat.
Informationillu taallat nutserneqarnissaat aamma kissaatigaa. "Taallammi kalaallit eqqarsartaasiannik innarlerneqarsimasumik qaqutigoortumik takutitsisuupput," aviisi taama allappoq.
Naliliinerit:
Jyllands-Posten: Ullorissanit arfinilinnit arfiniliusunit tallimat
Berlingske Tidende: Ullorissanit arfinilinnit arfiniliusunit tallimat
Ekstra Bladet: Ullorissanit arfinilinnit arfiniliusunit tallimat
Politiken: Ullorissanit arfinilinnit arfiniliusunit sisamat
Metroxspress: Ullorissanit arfinilinnit arfiniliusunit sisamat
