Nissiaqqat qiortagassat suiaqatinoortorpalaartut kalaalerpaluttut nunatsinniittunut tapersiissutaassasut

Nissiaqqat qiortagassat suiaaqatinoortunngorsakkat “Regnbuekravlenisser” Sebastian Soelbergimit suliaapput, taanna danskit suiaaqatinoortartut peqatigiiffiannik suliniuteqartuuvoq, qiortagassallu tuniniartarlugit, taassuma isertitami ilaat suiaqatinoortut peqatigiiffiannut assigiinngitsunut tunniussisarpoq.

Sebastian Soelberg ukioq manna nissiaqqat suiaaqatinoortorpalaartut kalaalinngorsarlugit titartarpai. Taakkununnga isertitsissutaasussat affaasa nalingi kalaallit suiaaqatinoortut peqatigiiffiannut Greenland+-imut tunniunniarlugu suliniuteqarpoq.

Greenland+ nunatsinni suiaaqatinoortartunut Nuummilu suiaaqatinut aaqqissuussanut soorlu Nuuk Pridenut sullissisuuvoq.

Danskit politikeriata Søren Papep nunarput afrikatut sikumiittutut assersuussilluni oqaaseqarnerata kingunerisaanik nunatsinnut aningaasaliinissaq isumassarsiarineqarpoq.

- Kalaallit Nunaata nunasiaataaneraniilli Danmarki Kalaallit Nunaannut pitsaanngitsumik iliuuseqartartoq, isumaqarpunga. Kalaallinut Danmarkimiittunut immikkoortitsisarpugut, suiaaqatinoortuunerlu apeqqutaanani immitsinnut pitsaanerusumik pisariaqartugut isumaqarpunga, “Regnbuekravlenisser af Sebastian Soelbergimi” ingerlatseqataasoq, Brian kjær Capkan KNR-imut oqarpoq.

AAMMA ATUARUK Ministeriunertut qinigassanngortittup nunarput Afrikatut sikumiittutut taasimallugu uppernarsaraa

Søren Pape Poulsen ministeriuninngorusulluni Folketingimut uani qinersisoqarnerani  qinigassanngortippoq. Taanna nikassaarpaluttumik nipeqartumik inatsiseqarnermut ministeritut nunarput Afrikatut sikumiittutut” taasimaneranik utoqqatsissuteqareerpoq.

Nuummi suiaaqatinoortunut neriusaamik illutaarnissaq

Nissiaqqat suiaaqatinoortorpalaarsarlugit qiortagassiat juullip tungaanut tuniniagaassapput, pappiliaq ataaseq 199 koruuninik akeqarpoq akiatalu affaata nalinga pisinermi ataatsimi Greenland+-imut tunniunneqartussanut illikartinneqassapput. Aningaasat 50.000 koruunit tunniunneqarnissaat siunertarineqarpoq.

Qiortagassat, tuniniaasut nittartagaatigut pisiarineqarsinnaapput, nunatsinnullu nassiunneqarsinnaallutik.

Aningaasat sumut atorneqassappat?

- Nunatsinni suiaaqatinoortartut illumik neriusaamik iserfigisinnaasaannik kissaateqarpugut, aningaasat ilaatigut tassunga atornissaat siunertaraarput, nunatsinni suiaaqatinoortartut illumi toqqissisimaffigisinnaasaannik tikilluaqqusaasutullu misigisimaffigisinnaasaannik amigaateqarpugut, Greenland+-imi siulersuisuunerni ilaasortaq, Sofus Fenger Hove oqarpoq.

- Nunatsinni suiaaqatinoortartut akuerineqartutut naleqartutullu misigiffigisinnaasaannik amigaateqarpugut.

Suiaaqatinoortuuneq peqqutaalluni inuit nakuuserfigineqartarnerat taassuma assersuutigaa, taakkuli suiaaqatinoortuunerat pillugu nakuuserfigineqarsimanerat politiinit immikkut kisitsisaatigineqanngillat.

AAMMA ATUARUK Kalaallit World Pridemi peqataasut: Nunatsinni LGBT+ pillugit saqqumilaartut amigaataapput

Taamaammallu nunatsinni suiaaqatinoortut illersorneqartutut misigisimanissaat pingaartinneqarpoq.

- Suiaaqatinoortartut nunatsinniittut toqqissisimanngitsutut ullutsinni misigisimasarput. Ajoraluartumillu suiaaqatinoortuunertik peqqutaalluni paasineqanngitsutut nikanartutullu misigisimasarput. Assersuutigiinnarsinnaavara inuit kamaleraangamik “homoq” oqaaseq akerartuutitut atortarpaat, tamatullu oqarfigineqarneq eqqarsartaatsikkut nakkarnartaqaaq, Sofus Fenger Hove oqarpoq.

Taassuma ilanngullugu maluginiaqquaa suiaaqatinoortartut imminut toqunnissaminnik eqqarsaateqarnissamut qaninnerusartut, imminullu toqoriaraluartarlutik.

Tamakku ilaatigut peqqutaallutik danskit suiaaqatinoortartuisa peqatigiiffiata Greenland+-imut aningaasaliinissartik aamma siunniuppaat. Aningaasat Nuummi suiaaqatinoortunut aaqqissuussinissanut Nuuk Pridemut suiaaqatinoortullu kinguaassiutimikkut suliaritissinnaanissaannut ilaatigut atorneqassapput.