Nuna tamakkerlugu coronapassi atorunnaarpoq
Neriniartarfinni, imerniartarfinni atuagaateqarfinnilu coronapassimik takutitsisarnissaq atorunnaarpoq.
Tusagassiortunik katersortitsinermi tamanna saqqummiuneqarpoq.
Qanermulli kiinnamullu assiaqutit piinngikkallakkit, Tasiilami, Ittoqqortoormiini kangianiluunniit sumiiffinni allani najugaqanngikkuit. Illoqarfinnimi taakkunani coronapassi qanermut kiinnamullu assiaqutit unnuaru unnuap qeqqanit piumasaqaataajunnaarput.
Nunatsinni killilersuutit – Naatsumik
Nunatsinni tamarmi tamanit iserfigineqarsinnaasuni coronapas atuutissaaq.
Tassa neriniartarfinni, imerniartarfinni, filmertarfinni, katersortarfinnilu assigisaanilu.
Ukununnga isissaguit qanermut assiaquteqassaatit:
- Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- Bussinut taxanullu ilaanermi.
Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
Imigassamik nioqquteqarneq nunatsinni kommuninit tallimanit sisamani februaarip aallaqqaataanut imaluunniit ulluisa qulingiluaannut inerteqqutaagallarpoq.
15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit.
Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.
Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
Sumiiffinnili allani tamanit orniganeqarsinnaasuni qanermut kiinnamullu assiaqutit suli piumasaqaataassapput.
Nunatsinni neriniartarfinnut imerniartarfinnullu qatserisartut amerlassusaasinnaasutut akuerisaasa affaannaat iseqqusaapput.
Kommuninilu pingasuni imigassat aalkoornartortallit februaarip qulingiluaata tungaanut tuniniagaaqqusaanngikkallarlutik.
Malittarisassalli sumiiffiit amerlanersaanni atuuttut, kangiani atorunnaavipput - tuniluuttoqanngimmat.
Tasiilami inuttaasut sapaatit akunnerata matuma siorna akerliussutsimik takutitsipput. Innuttaasuni aqqaneq-marlunnik amerlanernilluunniit ukiullit 90 procentiinit amerlanerit aappassaanik akiuussuserneqarsimasuupput.
Kalaallit Nunaata sinnerani inuttaasuni aqqaneq-marlunnik amerlanernilluunniit ukiullit 83 procentii aappassaanik akiuussuserneqarsimallutik.
Kalaallit Nunaanni inuttaasut tamakkerlugit 68 procentii aappassaanik akiuussuserneqarsimallutik.
- Coronappassip nunatsinni atorunnaarnera nuannaarutigeqaara, Naleqqameersoq, Peqqinnissamut Naalakkersuisuugallartoq, Pele Broberg oqarpoq.
- Kangiani akiuussuserneqarsimasut amerlammata killilersuutit taakkununnga atorunnaarsinneqarput.
- Nappaalanersuarmi ajornerpaaq maanna qaangeriartulerparput. Kisiannili sumiiffinni tamani killilersuutit qasukkanngilagut. Tamanna napparsimaveqarfiit suli malinnaasinnaannginnerannik pissuteqarpoq. Napparsimaveqarfinnimi sulisorpassuit nappaaluttut amerlapput, Pele Broberg oqarpoq.
Tuniluunneq annertooq – Sumiiffinnili arlalinni annikilliartortoq
Oqartussat oqarnerattut nunatta annersaani coronamik tunillaassuineq annertuvoq. Tunillatsittulli qasserpiaanersut ilisimaneqanngillaq.
Inuit peruluttut kisiisa PCR-imik maannakkut missorneqartarput. Inuit sinneri angerlarsimassapput peqqissinissartillu utaqqillugu, peqqissisutullu immimut nalunaarutigalutik. Tamanna misissuisarfiit peqqinnissaqarfiillu malinnaasinnaajunnaarnerannik pissuteqarpoq.
Tamaammat inuit tamarmik misissorneqarnissaat coronamik nunatsinni akiuinermi atorunnaarpoq. Inuppassuillu PCR-imik misissorneqanngikkunik, napparsimmavimmukassanngikkunik nakorsiartarfimmukassanngikkunillu tunillanneqarsimasorpassuit nalunaarsorneqarneq ajorput.
- Tuniluuppallaarunnaariartornera takusinnaallugu maanna oqaatigisinnaavarput, Nakorsaaneq Henrik L. Hansen oqarpoq.
AAMMA ATUARUK Naluttartut coronamit eqqugaasut: Timmisartoq ulikkaaqqammat unamminissamut periarfissarsisoqarpoq
- Nuummi sivitsortumik tunillaassuineq ingerlasimavoq. Maannali tunillaassuuppallaarunnaariartorpoq. Ilinniarnertuunngorniarfimmi ilinniartut atuanngitsoorneri, tassanilu amerlanerpaat tunillatsissimaneri kisitsisinngorlugit erseqqissorujussuarmik allaqqapput, nakorsaaneq oqarpoq.
- Atuarfinni aamma taamaappoq – atuanngitsoornerit siornatigornit maanna ikinnerujussuanngorsimapput.
- Sisimiuni tuniluunneq annertuvoq, piffissamilu tulliuttumi taamaakkallassaaq. Ilulissanili tuniluuppallaarunnaariartorpoq.
Sapaatip akunnerisa naaneri imigassaarniarfiunngitsut
Kommunini pingasuni suli imigassaarnianngikkallassapput, naak coronapasseqarnissaq piumasaqaataajunnaaraluartoq.
Kommunit pineqartut namminneerlutik imigassaarniartoqanngikkallarnissaanik kissaateqartuupput - Naalakkersuisunillu akuerineqarpoq. Akisarsisoqaqaqqammermat, sulinngiffeqarnermi aningaasarsisoqarmat utoqqalinersiutisisoqarmallu Kalaallit Nunaanni politiit imigassaarniatoqanngikkallarnissaanik qinnuteqarnermut tapersiipput. Politiillu napparsimmaveqarfinni politiinilu coronamik tunillanneqarsimasut amerlaneranni ulaperujussuarnissartik annilaangassutigaat.
Taava sapaatip akunnerata naanerani qanoq pisoqarpa?
Misissuisarnermut periuseq nutaaq
Misissueriaaseq allanngortinneqarpoq, taamaalilluni eqimattat maluinnaat misissuisarfimmut PCR-imik misissortikkiartorsinnaalerput:
Tassa utoqqaat inuillu uummatikkut puatigullu nappaateqartut tunillatsissimanermillu ersiuteqartut misissortikkiartorsinnaapput. Aamma inuit angerlarsimaffimminni sukkasuumik misissuutinit tunillatsissimasutut takussutisserneqartut.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
- Pisarnermit ulapputeqannginneroqaagut, politimesteri Bjørn Tegner Bay oqarpoq.
- Suliat assigiinngitsut sapaatip akunnerata naanerani 207-iupput. Ukiup siulianit sanilliullugit suliatta amerlassusaasa affaaraat. Angerlasimaffinni eqqissiviilliornerit nuna tamakkerlugu quliupput. Imigassamillu aalakoornartulimmik imigassartorfiusunut attuumassuteqartut suliagut ikinnerujussuupput, tamannalu coronamik unammilligaqarnitsinnut suliassatta ikinnerunerat oqilisaataasorujussuupput.
