Nunap assingi nutaat saqqummingajalerput: Assit pitsaanerusut tamatsinnut periarfissagissaarnerutitsipput
Nunatta sermeqanngitsortaani nunap assingi nutaarluinnaat tamatta ilisimalersinnaanngussavagut.
Namminersorlutik Oqartussammi Danmarkimilu Dataforsyning of Effektiveringip (SDFE) nunatta ilarujussuat assiliortornissaanik anguniagartik ukioq manna angussavaat.
Namminersorlutik Oqartussat tusagassiuutinut taama paasissutissiipput.
- Nunap assingi pitsaanerusut tamatta pitsaanerusunik periarfissippaatigut, aningaasanut aatsitassanullu Naalakkersuisoq, Naaja H. Nathanielsen (IA) oqarpoq.
AAMMA ATUARUK Nunap assingi nutaat suliarineqalersut
- Inuppassuit nunap sannai pillugit paasissutissat arlaatigut atortarpaat. Kommunimi sulisunit takornariartitsisartunut ilaqutariillu aavartut nunap assinginik nutaanik iluaquteqarsinnaapput, naalakkersuisoq erseqqissaavoq.
Nunap assingi nutaat qarasaasiatigut 2022-p ingerlanerani pissarsiarineqarsinnaalissapput.
Tamanit iserfigineqarsinanasussat aaku:
- Nuna tamakkerlugu qaammataasiakkut assilisanik nittartakkakkut sullissivik, maanna atorneqarsinnaalereersoq.
- Nunap assinga angissutsimut 1:50.000 naleqqiussaq nunap assinginut G250-inut taartaasussaq
- GIS-applikationinut tunuliaqutatut nunap assinga assersuutigalugu pisortat allaffeqarfiini pilersaarusiornermilu atorneqarsinnaasoq.
- Paasissutissat assigiinngitsut, ilaatigut pukkinnerit portunerillu ersersillugit assilisat, qatsissutsinut ilusiliaq aamma annertussutsinik paasissutissat.
Nunap assingi qanoq pissarsiarisinnaanerlugit uani annerusumik atuagaqarsinnaavutit.
Nunap assingi paasissutissallu nutaat Danmarkimi Styrelse for Dataforsyning of Effektiviseringimit (SDFE) suliarineqarput.
AAMMA ATUARUK Immap assingi elekroniskiusut piuminarsakkat kinguaattoorutaasullu tikingajalersut
Nunap assinginik suliaqarnermi Namminersorlutik Oqartussat, Asiaq (Nunatsinni misissueqqaartarfik), Forsvarsministeriets Materiel- og Indkøbsstyrelse aamma A.P. Møller nuliatalu Chastine McKinney Møllerip aningaasaateqarfiat suleqatigiipput.
