Nunaqarfimmi aqutsisut siulittaasuat: Oqallisaasut taakkuujuarput

Inoqarfiit minnerit pillugit Ilulissani ataatsimeersuarneq sisamanngornermi naammassivoq.

Upernaviup eqqaani Aappilattumi nunaqarfimmi aqutsisut siulittaasuat, Karl Petersen, ajornartorsiutit oqallisaasut, soorlu anartarfinnut puussiartaleqqittakkanut eqqakkanillu passussinermut tunngasut aaqqinneqarnissaannik neriuttuaraluarami maanna ilimasunngilaq.

Taanna nunaqarfimmi aqutsisuni 2013-mit siulittaasuuvoq. Maannamullu pingasoriarluni ataatsimeersuaqataasarpoq. Nikeriartoqarnerli ajorneranik qatsussivoq.

- 2013-mi ataatsimeersuarneq aallartikkaangat, taavalu 2017-mi maannalu 2022-mi oqaatsit taakkua assigiinnarpai, Karl Petersen KNR-mut oqarpoq.

Taassuma ukiuni siuliini ataatsimeersuartarnerni nunaqarfimmiut aaqqikkusutatut kissaatigiuagaat soorlu anartarfinnut tunngasut suli iluarsiivingineqannginnerat pakatsissutigiuarpaa.

- 2022-mi takussaasoqarpallaanngilaq taakku taamanikkut kissaatit najoqqutaralugit.

- Maanna atukkagut qamani aamma eqqartoqqippaat. Pissutsit taakkua uteqattaarput, Karl Petersen oqarpoq.

Qaaqqusisoq: Kissaataanniit periusissiussuugut

Taassuma pakatseqqissinnaanissaa ataatsimeersuarnermut qaaqqusisuusup isumaginninnermut, suliffeqarnermut, nunamullu namminermut naalakkersuisup toqqaannartumik akisinnaanngilaa. Ataatsimeersuarnermimi oqallisaasut tunngavigalugit suliaqarniarput. Tamanulli aningaasassaqannginnamik pingaarnersiuisariaqarlutik oqarpoq.

- Periusissiornissaq siunertaraarput, siunnerfilersuinerlu. Pingaarnersiunissaq taanna aamma pinngitsoorneqarsinnaassanngilaq, Jess Svane (S) oqarpoq.

Naalakkersuisut, borgmesterit, nunaqarfinni aqutsisut, najukkani ataatsimiititaliat, atorfilittallu ataatsimeersuarnemi peqataapput.

Ataatsimeersuarneq aningaasanut inatsisikkut 1,5 million koruuninik aningaasalerneqarnikuuvoq.