Nunaqarfinni Iridiuminik pisariaqartitsineq naalakkersuisup paasilluarpaa
Tunumi piterarmat Tiilerilaami sapaatip akunningajaani attaveerunneq tusarliutereerippullu nunaqarfiit peqatigiiffiat KANUNUPE nunaqarfiit tamaasa qaammataasanut attavilinnik oqarasuaasersoqqullugit naalakkersuisunut piumasaqarpoq. Tamannalu kommunit ilaannit taperserneqarpoq.
Oqartussat oqaloqatigittariaqarput
Kommune Kujalliup nunaqarfini aqqanillit qaammataasanut attavilinnik oqarasuaateqartinngilai, nunaqarfiilli attaveqartuaannarnissaat Upalungaarsimanermut ataatsimiititaliarsuarmut qaqissamaalerini, Kommuni Kujallermi borgmesteri Stine Egede oqarpoq.
-Tunumi pisimasorpiaq aallaavigalugu Upalungaarsimanermut ataatsimiiititaliarlu tullianik ataatsimiinnissatsinnut qaqitassanngortitassanngorpoq.
Kommunilli kisimiillutik nunaqarfinnut qaammataasakkut attavilinnik oqarasuaasersuisuunissaat Stine Egedep apeqquserpaa:
- Isumaqarpunga sillimaniarneq eqqarsaatigalugu, peqqinnissaqarfik, politiit, qatserisartut taakkuusariaqartut eqqartueqatigiittussat.
Kommune Kujallermi nunaqarfiit tamakkerlugit qaammataasakkut attavilinnik oqarasuaasersorneqassappata tamanna ukiumut 43.000 koruunit missaannik aningaasartuutaasassasoq Stine Egede oqarpoq. Pisariaqarnerarpaali:
- Ajutoornermi ikiortissarsiornissaq eqqarsaatigalugu aningaasat taakku aamma taama annertutiginngillat. Susassaqarfiit tamatta immikkut peqanngikkaluarluta immaqa aningaasat taakku agguaanneqarsinnaagaluarput susassaqarfinnut pingasunut.
Pisariaqartitsineq naalakkersuisup paasilluarnerarpaa
Qaammataasanut attavilinnik nunaqarfinni oqarasuaasersuinissamik kissaat paasilluarini, ajornartorsiullu iluarsiniarlugu sulinermi naalakkersuisoqarfiit arlallit suleqatigiittut Attaveqaasersuuteqarnermut naalakkersuisoq Erik Jensen oqarpoq:
- Anori imaluunniit silarluit assigiinngitsut sakkortusiartortarinerisa malitsigisaanik taamatut innuttaaasut toqqissisimajunnartannginnissaat qulakkeerniarlugu aaqqissuutissanik uagut naalakkersuisunit suliaqarpugut, ilaatigullu kommunit oqaloqatigilluarnissaat pingaartillutigu.
Peqqissutsimut naalakkersuisoqarfik, pinngortitamut avatangiisiniullu naalakkersuisoqarfik upalungaasimanermut akisussaasoq, naalakkersuisut siulittasoqarfik, ingerlatseqatigiiffinnut akisussaasuusoq, nunamut namminermut naalakkersuisoqarfik kommuninut akisussaasuusoq kiisalu nammineq naalakkersuisoqarfini suleqatigiissanerarpai.
Nunaqarfiit qaammataasanut attavilinnik oqarasuaasersorneqarsinnaanerannik apeqqut Naalakkersuisut kommunillu februaarimi ataatsimiilerpata oqaluuserineqassasoq Erik Jensen oqarpoq.
Nunaqarfiit ilaannat Iridiumeqartitaapput
Kommuni Qeqertalimmi Qeqqatalu kommuniani borgmesterit oqarput kommuniminni nunaqarfiit qaammataasanut attavilinnik oqarasuaateqarnissaat pillugu saaffigineqarsimannginnamik peqartitsinissamut pilersaaruteqanngikkallarlutik, pisariaqassappalli nunaqarfittatillu oqaloqatigiissutigeqqaartariaqassanerarpaat.
Avannaata Kommunia 17-inik iridiumeqarpoq, taakkunannga arfineq pingasut nunaqarfinni atorneqarput. Taakku saniatigut Uummannap Sullua tallimanik qaammataasanut attavilinnik oqarasuaateqartitaavoq.
