Nunarput Islandilu suleqatigiinnissamik isumaqatigiittut

Aalisarneq, ilinniartitaaneq naligiissitaanerlu pillugit nunatta Islandilu suleqatigiinnissaminnik isumaqatigiissusiaminnik atsioqatigiissutigisaanni allaaserisanut ilaapput.

Nunarput Islandilu suleqatigiinnissaminnut nalunaarummik ullumi sisamanngornermi atsioqatigiipput.

Naalakkersuisut tusagassiuutinut nalunaarummi taama allapput.

Suleqatigiinnissamik isumaqatigiissummik Naalakkersuisut siulittaasuat, Múte B. Egede aamma Islandip ministeriunerat Katrín Jakobsdóttir atsioqatigiittuupput.

Isumaqatigiissut qulequttanik pingaarnersiukkanik arfineq marlunnik imaqarpoq, tassalu: Niuerneq, aalisarneq, aningaasaqarnikkut suleqatigiinneq, naligiisitaaneq, ilinniartitaaneq ilisimatusarnerlu aammalu kulturikkut suleqatigiinneq.

Nunarput Islandilu Atlantikup Avannaani Issittumilu ataatsimut arlalinnik soqutigisaqaqatigiillutillu periarfissaqartut, Islandip ministeriunera Katrín Jakobsdóttir aamma nunatta naalakkersuisuisa siulittasuat Múte B. Egede isumatigiipput.

Silallu pissusiata allanngoriartornerani avatangiisimullu illersuiniarnermut assingusunik ilungersornartorsiorfeqartut, Naalakkersuisut siulittaasuat, Múte B. Egede tusagassiuutinut nalunaarummi allappoq.

- Ataatsimoorluta siunissaq ilusilersorsinnaavarput kalaallit Islandimiullu innuttaasuinut iluaqutaasussamik. Suleqatigiinnissatsinnut siunissamullu qaamanerusumut isigisinnaalernerput uppernarsaratsigu nuannaarutigeqaara, taanna oqarpoq.

Kalaallit Nunaata Islandillu siunissami suleqatigiinnissamik nalunaarut isumaqatigiissutaat ullumi sisamanngornermi Islandimi Reykjavikkimi atsioqatigiissutigineqarpoq.

Naalakkersuisut siulittaasuata Múte B. Egedep, Islandillu Ministeriunerata Katrín Jakobsdóttirip, ukioq allortarlugu Nuummi Reykjavikkimilu nikittaallugit suliassatut pingaarnersiukkat ataasiakkaarlugit killiffissiorniarlugit ataatsimiittassapput.