Nunarput plastikkinik mingutsitsineq unitsinniarlugu siuttooqataasoq
- Nunarput avatangiisinut piujuartitsinermullu tunngatillugu pitsaasumik malugineqarsinnaatitseqqippoq.
Nunarput sapaatip akunnerata siuliani suleqatigiinnut, plastikkip ajornartorsiutaaneranik 2040 nallertinnagu akiuiniarnissamik siunertaqartunut, High Ambition Coalition to End Plastic Pollutionimut ilaalerpoq.
Rwanda, Norge, Canada, Peru, Tyskland, Senegal, Georgien, Sydkorea, Storbritannien, Schweiz, Portugal, Chile, Danmark, Finland, Sverige, Costa Rica, Island, Ecuador, Frankrig, Den Dominikanske Republik, Uruguay, Ghana, Monaco, Slovenien, Forenede Arabiske Emirater, Irland, Seychellerne, Holland, Belgien, Luxembourg aammaGrønland
Nunalerinermut, Imminut Pilersornermut, Nukissiornermut Avatangiisinullu Naalakkersuisoqarfik tusagassiuutinut nalunaarummi allappoq.
Nunarput taamaalilluni nunanit 30-nit allanit peqataaffigineqartumut plastikkimik mingutsitsinermik akiuiniartumut ilannguppoq.
Naalagaaffiit Peqatigiit plastikkit pillugit nunarsuarmut pituttuiffiusussamut isumaqatigiissuteqarneratigut suleqatigiit pilersinneqarput.
- Ilaalernitsigut Kalaallit Nunaata plastikkinik mingutsitsinermut akiuiniarluni suliniuteqarnermi siuttooqataanissaanut nukittuumik oqariartuuteqassaagut. Plastikkit pinngortitamut pisartut avatangiisitsinnut peqqissutsitsinnullu sunniuteqarnerluttarput, nunalerinermut, imminut pilersornermut, nukissiornermut avatangiisinullu naalakkersuisoq, Kalistat Lund oqarpoq.
Isumaqatigiissuteqarnermi allannguutit nunarsuarmi nunatsinnilu malugineqarsinnaasapput.
- Qularinngilarput, ilaatigut plastikkinik tunisassiortarneq aamma kemikaliani plastikkinik atuisarneq pillugu nunarsuarmi isumaqatigiissuteqartoqarnissaa Kalaallit Nunaanni avatangiisinut inuillu peqqissusaannut iluaqutaassasoq, Kalistat Lund oqarpoq.
Plastikkinit sanaat ataasiaannagassat sapaatip akunnerata tullianit pisiarineqarsinnaajunnaassasut
Nunatta silap pissusianut piujuartitsinissamullu tunngatillugu siuttuunissamik angusaqarusulluarnera nutaarsiassaanngilaq.
Naalakkersuisummi nunatsinni plastikkinik mingutsitsinnginnerulernissamut nunatsinni assigiinngitsunik suliniuteqareerput.
Assersuutigalugu plastikkinit sanaat ataasiaannarlugit atortakkat soorlu ataasiaannarlugit atortakkat, milluaatit vatpindillu novembarip aallaqqaataanit pisiarineqarsinnaajunnaassapput.
AAMMA ATUARUK Plastikkit ataasiaannagassat pitsaasuunngillat: Naalakkersuisut inerteqquteqalerusupput
Tamatuma saniatigut aalisarnermut, piniarnermut aallaaniarnermullu atortorissaarutit pinngortitami annaasanut suliniuteqarnermullu pilersaaruteqareerlunilu plastikkit pinngortitamiittut annikillisarnissaanut pilersaaruteqareerpoq.
Plastikkinik atuineq marloriaatinngornissaa siulittorneqartoq
Plastikkinik ataasiaannarlugit atortakkanik atuineq annertusiartuinnarsimavoq.
Plastikkinik sanaartorneq atuinerlu ukiut 30-t matuma siorna sisamariaammik annikinneruvoq.
High Ambition Coalition to End Plastic Pollutionip plastikkinik atuineq unitsinneqanngippat ukiut 20-t tulliuttut ingerlaneranni marloriaatinngussasoq siulittorpaa. Tamanna plastikkinik ataasiaannarlugit atortakkanik piumasaqartoqangaatsiarneranik pingaartumik pissuteqarpoq.
Tamanna suliniaqatigiiffiup nittartagaani atuarneqarsinnaavoq.
