40-leereersimasunut sioqqutsisumik pingajussaanik akiuussusersuisoqalertoq

Danmarkimi coronap nutaatut takkuttup kingulliup, Omikronip, siaruaannera peqqutigalugu 40-leereersimasunut sioqqutsisumik pingajussaanik akiuussusersuisoqarpoq.

Damnarkimi akiuussutissamut sakkortusaataasumik, danskisut boosterimik taaneqartartumik, kapitinnermit qaammatit arfinillit qaanngiutereerpata kapiteqqissinnaanerat siornatigut innersuussutaagaluarpoq.

Danmarkimi aappassaanik kapitinnermit, qaammatit sisamat sapaatillu akunneri marluk qaangiussimalerneranni pingajussaanik kapitissinnaaneq maanna periarfissanngorpoq.

Coronap allannguutaa, Omikron, Danmarkimi tuniluutipiloorpoq, nunatsinnili suli nassaartoqanngilaq.

Omikronip nunatsinnut anngutinnissaata tuniluunnissaatalu aarlerinartuunera peqqutigalugu, Nunatsinni Nakorsaaneqarfik, Danmarkimi periuseq atorlugu, sioqqutsisumik pingajussaanik covid-19-mut akiuussusersuilerpoq.

Taama nunatta nakorsaanera, Henrik L. Hansen nassuiaavoq.

- Omikronip Kalaallit Nunaannut anngunnissaa apeqqusertariaqanngilaq. Taannami sapaatit akunnialuit iluanni anngutissaaq. Taamaattumik akiuussusersuinissamut periusissiarput naleqqussartariaqarparput, 40-leereersimasunut utoqqarnullu tamanut naleqqussarnissaa suliarisariaqarparput. Taakkuuppummi nappaammit eqqornerlunneqarnerpaasartut.

Tamanna isumaqarpoq, 40-leereersimaguit, juulillu naalernerani aappassaanik akiuussusertissimaguit, ullumikkumit pingajussaanik kapitissinnaavutit.

Mæslingitupajaaq tuniluutiatigisoq

Nakorsaaneqarfik naapertorlugu pingajussaannik kapitinneq, covid-19-imik tunillatsinnginnissamut qanillisaataavoq. Akiuussutissammi sunniunnera taamaalilluni sivisunerussammat. Omikronillu takkuttussaanera pillugu covid-19-imut illersorsinnaanissaq suli pingaaruteqarnerulerpoq.

- Tuniuuttoq nutaaq mæslinngitupajaaq immaqa tuniluutiatigivoq. Soorlu inuup tunillatsissimasup killilersuisoqannginnerani inuit 16-it tunillassavai. Kalaallit Nunaanni illoqarfimmi innuttaasut 97 procentii mæslingimik tunillanneqarnikuupput. Taamaattumik maanna taamak pisoqassanngilaq. Akiuussutissaqarlunilu allanik killilersuuteqarpoq. Maannamulli takusimasatsinnit amerlanerit tunillatsinnissaat qularnanngilaq, nunatta nakorsaanera, tusagassiuutinut nalunaarummi oqarpoq.  

Sumiiffiit ilaanni peqqissaavimmit aggersarneqarumaarputit, sumiiffiilli ilaanni ornigutiinnarluni kapitikkiartortoqarsinnaajumaarpoq.

Sisimiuni pingajussaannik kapitinnissaq pingasunngornermit tallimanngornermut neqeroorutaassaaq. Ukioqatigiiaat tamarmik sms-ikkut allaffigineqarlutik oqarasuaatikkulluunniit sianerfigineqarlutik aggersarneqassasut, nakorsaaneqarfik allappoq.

Nuummi Inussivimmi sapaatit akunnerata tulliani ataatsinngornermi marlunngornermilu pingajussaanik kapitinnisamik neqerooruteqassaaq.

Tusagassiortunik pingasunngornermi ataatsimut katersortitsineq

Tunngaviusumik akiuussusersuinermi akiuussutissat marluupput. Siulleq Pfizer/Biontechimit aappaalu Modernamit.

Akiuussutissaq pingajussaanut neqeroorutigineqartoq aappassaani akiuussutissaq assigissavaa. Soorlu Pfizer/Biontechimik akiuussitissamik kapitissimaguit, taava pingajussaanik kapissaguit akiuussutissaq Pfizer/Biontechimeersoq atorneqassaaq.

Danmarkimi novemberip naalernerani meeqqat tallimat aqqanillillu  akornanni ukiullit akiuussuserneqarput. Nunatsinnili 40-ruleereersimasut sioqqutsisumik pingajussaanik covid-19-imut akiuussusersuisoqalersinnaanera peqqutigalugu, meeqqanut tallimanit aqqanilinnut ukiulinnut akiuussusiineq, januaarimi aatsaat aallartinneqassoq, nakorsaaneq oqarpoq. 

Naalakkersuisut siulittaasuat, Múte B. Egede (IA), peqqissutsimut naalakkersuisoq, Kirsten L. Fencker, nakorsaaneq peqatigalugu tusagassiortunik pingaasunngorpat nalunaaqutaq 13.00 aggersaassapput.