Nunatsinni isiginnaartartut Ramasjang nutaaq takusinnaalissavaat

Kulturimut Naalakkersuisoq Mimi Karlsen apeqquteqaammut akissuteqarluni allappoq nuna tamakkerlugu TV-kanalit pingasuusut, tassaasut DR HDp, DR Kulturip aamma Ramasjangip allanngornissaat aalajangiunneqartoq.

Tassalu 2013-imi januaarip allaqqaataaniit Namminersorlutik Oqartussat digitalikkut nassitsissutaatigut aallakaatittakkat tassaalissapput DR 1, DR 2 aamma DR Ultra Ramasjang taanna - nutaajusussaavoq, meeqqanullu anginernut naatsorsuussaalluni, kulturimut naalakkersuisoq Mimi Karlsen akissuteqarluni taama allappoq.

Digitalikkut nuna tamakkerlugu aallakaatitsisoqartarmat, DR-imiit kanalitigut pingasutigut nuna tamakkerlugu sullissinissamik neqeroorutip tamatuma, KNR periarfississavaa KNR 1-ikkut kalaallisuinnaq / Kalaallit Nunaanni suliaannarnik aallakaatitsisarnissamut.

Maannamut atuuttutut KNR 2 Inatsisartut ataatsimiinnerinik aallakaatitsisassaaq, ataatsimiinnerillu akornini maannakkorpiaq pisut pillugit, ilassutaasumillu aallakaatitanik aallakaatitassiorsinnaassalluni, soorlu kommunini sisamani kommunalbestyrelsit ataatsimiinnerinit.

Neqeroorutit nutaat - aningaasaliissutaasut iluini - amerlanerpaanut naapertuunnissaat neriuutigineqarpoq, Kulturimut Naalakkersuisoq Mimi Karlsen akissuteqaammini taama allappoq.