Nuummi angut arnamik toqutseriarsimasutut pasineqartoq

Nuummi angut 30-t sinnilaarlugit ukiulik toqutseriarsimasutut pasineqarluni ippassaani arfininngornermi tigusarineqartoq tigummigallagassanngortinneqarpoq. 

Nunatsinni politiit taama ilisimatitsipput.

Nuummi arnaq 20-t sinnerlugit ukiulik Nuussuarmi ippassaani arfininngornermi savilersorfigineqarpoq. Angut 30-t sinnilaarlugit ukiulik toqutseriarsimasutut pasineqarluni tamatuma kingorna tigusarineqarpoq.

Angut pasisaq eqqartuussivimmi ippassaq sapaammi sassartinneqarpoq. Pasisao matoqqasumik sassartinneqarnera peqqutaalluni pasisaq savilersorfigineqartorlu qanoq ilisarisimasariitsiginersut taamatullu pisoqarneranut suna pissutaasimasinnaanersoq ilisimatitsissutigisinnaanngikkitsik, nunatsinni politiit nalunaarput.

Angut pasisaq ulluni 25-ni tigummigallagassanngortinneqassasoq, eqqartuussiviup aalajangerpaa.

Pisoq pillugu misissuisoqarnera pisullu matoqqasumik suliarineqarnera peqqutaallutik politiit annerusumik oqaaseqarusunngillat. 

Arnarli savilersorfigineqartoq inuunerminik navianartorsiunngitsoq, politiit ilisimatitsissutigaat.