Nuummi ikuallattoqartoq: Qatserisartut arlallit qatseriartortut
Nuummi tallimanngornermi illu sanaartugaq ikuallaleraluarpoq. Ikuallannerli qamikkasuarneqarluni, arfininngornermili aamma qatserisartut taakunngakaaqqipput, ilimagineqarporlu inneq ikummarisseqqikkaluartoq.
Tallimanngormat illumi sanaartukkami ikuallaleraluarneq qaminneqarpoq. Arfininngornermilu taanna aamma ikuallaqqileraluarpoq.
juulip 09-at 2022 14:39
Ippassaq nalunaaqutaq 17.30 Nuummi politiit Tuapuannguani illuliat ilaannik ikuallattoqarneranik kalerrinneqarput.
Inunnilli ajoqusertoqanngilaq ikuallannerlu akunnerup ataatsip iluani qaminneqarpoq.
Ullumilu arfininngornermi ualikkut nalunaaqutaq 13.30 missaani qatserisartut arlallit ikuallaffiusumukaallutik ulappuseqqipput.
Ippassarlu ikuallaleraluartoq imaassinnaasorineqarpoq ikuallaqqileraluarsimasoq.
Suliarli suli ingerlammat tamanna naliliigallarnerusoq politiit pigaartuisa ittuat Bent Johnsen KNR-mut ualimut oqarpoq.
Politiit aamma erseqqissaatigaat ippassaq ikuallaleraluartoq tassaasoq pappialarsuaq illup qaavanut qalissiaq.
