Nuummi iliveqarfiit ilaat kuuttoq
Nuummi kiisami upernaleqaaq. Apinikooqigamilu aput aattoq annertoqaaq. Inuppassuit upernarnissaanut qilanaarrannikuupput, upernarnerali iliveqarfimmi ulapputaavoq.
Tassami aput aattulersimasoq ilerrit akornisigut kuulluni iliveqarfiup ilaanut masarlunnguutsiterpoq.
Asseq nassiussarsiaq.
Kommuneqarfik Sermersooq iliveqarfilerinermi akisussaasuuvoq, iliveqarfiullu kuunnera kommunimiit arajutsisimaneqanngilaq.
- Assaasartut iliveqarfimmi sapaatit akunnerata matuma siuliini iluarsaassipput. Suli aputeqaqimmat sulilu kooqimmat iluarsaassiinnarallassapput, Kommuneqarfik Sermersuup sanarfinermut avatangiisinullu ingerlatsiviani fagchefi Margrethe Hegelund KNR-imut allappoq.
Asseq nassiussarsiaq.
Iliveqarfilerisullu alaatsinaassasut isumaqatigiissuteqarfigisimagitik, taanna nassuiaavoq. Iliveqarfilerisut sioqqat kuugussaaneranni kussininnguunnerit sioqqanik matuussavaat ilerrillu iluarsaallugit.
- Aputeqaqimmat aasaq tamaat ulapputaassapput, Margrethe Hegelund oqarpoq.
