Nuummi inuit: Mikael Petersenip eqqartuunneqarnera sakkukippallaarpoq
Siumumi aamma Naleqqami partiinut allattaanerusimasoq, Mikael Petersen, ulluni 40-ni pineqaatissinneqarsimasunut inissiisarfimmiittussanngortinneqarpoq.
Nuummi innuttaasut suliaq aamma inaarutaasumik eqqartuussutaanera qanoq isumaqarfigineraat KNR-imit tusarniarpagut.
Poul Heilmann. Asseq: Karline Platou // KNR
- Mikaalip taamatut iliorsimanera akuersaarneqarsinnaanngilaq, aamma qujanaannarpoq taamatut tusagassiutitigut toqqaannartumik qaqinneqarsimanera, Poul Heilmann oqarpoq.
- Sumi atorfeqarneq apeqqutaanngilaq inunnut taamatut paquminartumik pissuseqartussaanngilagut aamma suligaluarutta sulinngikkaluaruttaluunniit, oqarpoq.
Laila Knudsen Thomassen. Asseq: Karline Platou // KNR
Suliaq naatsumik
- Sumut partiimi allatsigisimasaa, Mikael Petersen Nunatta Eqqartuussisuuneqarfianit kannguttaatsuliorsimasutut sisamanngormat piumasaqaatitaqanngitsumik ulluni 40-ni pineqaatissinneqarsimasunut inissiisarfimmiittussanngortinneqarpoq.
- Eqqartuussivimmi suliaq januaarimi suliarineqarpoq. Mikael Petersen taamani ulluni 60-ini pineqaatissinneqarsimasunut inissiisarfimmiittussanngortinneqarpoq. Taassuma aalajangerneq taanna suliassanngorteqqippaa.
- Mikael Petersen arnanut sisamanut Siumup partiiata allaffianut 2013-imit 2019-imut attuumassuteqartunut kannguttaatsuliorsimasutut unnerluutigineqarpoq.
- Folketingimut ilaasortaq, Aki-Matilda Høegh-Dam taakkununnga ilaavoq.
-
Aki-Matilda Høegh-Damip nassuiaatigaa: ’Oqimaalleqqilariaruni siniffimmi ilagalugu mamassasoq’, ’amaamaalu allisimasut’ taassuma oqaatigisimagaa. Nutsani naamallugit assani nuluminukartissimagai aamma oqaatigalugu.
-
Mikael Petersen Siumumi ukiuni 38-ni suliarineqarpoq, taannalu Naalakkersuisunut aamma ilaasortaanikuulluni. Aamma Siumumi siulittaasumut tullersortaanikuuvoq.
- Isumaqarpunga iliuusaa eqqarsaatigalugu ullulluunniit 40-t amigartut, taamatummi pisimanera inuup pineqartup naleqassusaanik asissuineruvoq nakkarsaanerullunilu qanorluunniit malunnanngisaartigigaluaraanni. Taamaattumik tamanna pissusissamisoortutut isigivara allatut ajornaqaaq, Laila Knudsen Thomassen oqarpoq.
Laila Knudsen Thomassen inuusuttuunermini nammineq assingusumik misigisaqarsimavoq:
- Torragivara arnat taakku sapiillutik saqqummermata, uanga taamani taamatut pineqarama oqarsinnaanikuunngilanga. Taamaammat taakkua arnat maligassiuisutut isigivakka, aamma tamakku unitsinneqartariaqarput iliuuseqartariaqarpugullu, Laila Knudsen Thomassen oqarpoq.
Ullut 40-lluunniit amigarput. Ullut qassit illit isummat naapertorlugu naapertuutissagaluaramik?
- Apeqqutaavoq iliuuserisimasaa qanoq ittorpiaasimanersoq, isumaqarpunga pinngitsaalivissimappagu ukiorpassuusariaqaraluarput taamaaliorneq inummut asissuinerummat.
Bikki Kleist Jepsen. Asseq: Karline Platou // KNR
- Pissusissamisuunngilaq, inoqatitsinnut killissagut qaangertartussaanngilagut killissagut nammineq nalunngittussaavagut, Bikki Kleist Jepsen oqarpoq.
- Periuseq eqqarsartaaserlu allanngortittariaqarpagut, inoqatinut assigiinngitsutigut kannguttaatsuliortarnerit inueqatigiinni tamatta eqqartueqatigiilluta qaangerniartariaqarpagut, eqqartueqatigiinnissaq pingaartorujussuuvoq kinguaassagut eqqarsaatigalugit, oqarpoq.
Aqqa Kristiansen. Asseq: Karline Platou // KNR
Aqqa Kristiansen paneqarpoq erneqarlunilu. Qitornami siunissaat eqqarsaatigalugu ulluni 40-ni isertitsivimmiittussanngortitsineq sakkukigivaa.
- Taassuma pissusilersuutigisarsimasai sakkortusimapput, taava inuit allat taama pisartut eqqarsarsinnaapput ajunngilaq ullut 40-innaapput taamatut pigaluaruma ulluni 40-innarni isertitsivimmiissaanga. Taamaattumik isumaqarpunga ullut suli amerlanerusariaqaraluartut, Aqqa Kristiansen oqarpoq.
