Nuummi juullimi utoqqaat illuinut pulaarnissamut malittarisassat nutaat

Juullimi Nuummi aatat aanalluunniit utoqqaat illuannut pulaassamaarukku, corona pillugu eqqaamasariaqakkannik malittarisassaqarpoq. 

Nuummi tunillatsittut amerleriarneri pissutigalugit, utoqqaat illluinut pulaarsinnaasut killilersorneqalernissaat Kommuneqarfik Sermersuup aalajangerpaa. 

Ullumimiit januaarip ulluisa aappaat ilanngullugu annerpaamik inuit pingasut utoqqaat illuannut pulaarsinnaatitaalerput. Tamannalu tamanut atuuppoq. Tamanna aamma qanorluunniit ukioqaraluartunut, aamma qanitanut atuuttoq, Kommuneqarfik Sermersooq nalunaarpoq. 

- Juullip nalaani ukiup sinneraniit utoqqaat illuinut pulaartoqarnerusarpoq. Coronap nunatsinni tunillaassuunnera pissutigalugu ajoraluartumik killilersuisariaqarpugut, nappaat utoqqaat illuinut eqqunneqarsinnaanera killilersimaarniarlugu, Ejner Grønvold, Atugarissaarnermut Suliffeqarnermullu ingerlatsivimmi pisortaq oqarpoq.

Utoqqaat illui tamanit ornigarneqarsinnaammata pulaarnermi qanimut assiaqutit PINNGITSOORATIK atorneqassapput.  

Tamatuma saniatigut Covod-19 pinaveersaarlugu peqqussutit nalinginnaat pulaartut eqqaamassavaat:

• Napparsimaguit napparsimasutulluunniit misigiguit utoqqaat illuannut pulaassanngilatit.
• Assatit asakulaakkit imaluunniit assannut spriti atortaruk.
• Ikusinnut quersorlutillu tangajortarit, aamma qanimut assiaquteqaruit.
• Inuit attornaveersaakkit – assamminneq, ersakkut kunitsineq, eqitaarineq assigisaallu pinaveersaakkit.
• Inuit qanillinaveersaakkit inuillu allat isumassueqqusakkit.