Nuummi nukappiaraq kattunneqarluni saassunneqartoq Rigshospitalimi suliaritittariaqartoq: Anaana uternissaminut aarlerisoq
Nuummi nukappiaraq14-inik ukiulik inuusuttunut sullissiviup silataani unnukkut februaarip arfineq aappaanni saassutsippoq.
Meeraqataasa sisamaallutik kattullugu saassuppaat, meeqqat tallimaasa pisoq mobiilikkut filmiliarigaa.
Nukappiaqqap persuttarneqarnermini isaata ataaniittoq saaneq apineqarpoq, Rigshospitalimut suliaritittariaqarneranik kinguneqartumik.
Nukappiaqqamut 14-inik ukiulimmut anaanaasoq, pisumut attortisimaqaaq.
- Annernarpoq, pakatsinarpoq, anaanaasoq, Karline Nielsen KNR-imut oqarpoq.
- Suli iluamik eqqissinngilanga. Suli iluamik eqqissillungaluunniit sininnikuunngilanga, iluamilluunniit nerisinnaanngilanga. Misigissutsikka nikerartorujussuupput
Nuummi politiit nukappiaraq 14-inik ukiulik meeraqatiminit ujajaaffigineqarluni saassutsissimasoq pillugu februaarip arfineq aappaanni unnukkut nalunaaqutaq 19:56 nalunaarfigineqarput.
Kalaallit Nunaanni politiit pigaartuisa pisortaat, Bjørn Bjerregaard uppernarsaavoq.
Atuarfimmi nakuuserneq
Meeqqat eqimattanngorlutik kattussillutik annersaasartut ikiorneqarnissaannik, Karline Nielsen kissaateqaraluarpoq. Ernerami Nuummut uterpat taamaalioqqinneqarnissaa anaanaata aarleqqutigalugu KNR-imutilanngullugu oqarpoq.
14-inik ukiulik ukiut marluk matuma siorna meeraqatiminit saassunneqarnikuusoq aamma anaanaata oqaluttuaraa.
- Ernera siullermeerluni aatsaat meeraqatiminit persuttagaanngilaq. Atuarfimmini aamma taamaaliorneqartarpoq.
- Børnepsykologinik oqaloqatiginnittalernikuuvoq. Nuummi inuusuttunut sullivimmi tarnip pissusianik ilisimasalimmik oqaloqatiginnittalernini assut iluaqutigivaa.
Atuarfimmi nukappiaqqamut arnisaasoqarsimaneranik uppersarnaatitsiniarluta Kommuneqarfik Sermersuumiit uppernarsartinniarlugu KNR-imiit oqaaseqartitsiniarsarivugut.
Peqatigiiffiup aningaasanik katersuiniukkai
Nukappiaqqap Rigshospitalimi suliaritinneranut atatillugu, Meeqqat Angajoqqaallu Peqqissutsimikkut Ikinngutaat – MAPI peqatigiiffik aningaasanik katersuiniartitsivoq. Peqatigiiffik nunatsinni meeqqanut ikiuiniarnermik siunertaqartuuvoq.
Iframes are not shown in preview.
Caption
Peqatigiiffik Facebookimut quppernerminut ima allappoq.
- Naammaleqaaq! Tullissaani naluarput meeqqat allat taamannak pineqarlutik toqutsinermik kinguneqarsinnaasoq. Xander katersuiniupparput risesamtalernissaanut aningaasartuutissanut aammalu advokatinut aningaasartuutissanut, peqatigiiffik quppernerminut allappoq.
Aatsaat taamaaliortoqanngilaq
Meeqqanik eqimattanik meeraqatiminnik saassussillutik persuttaasarnerat nutaarsiassaanngilaq. Siornaammi meeqqat illersuisuata politiillu tamanna ajornartorsiutaanera pillugu ilaatigut aamma qisuariaateqarnikuupput.
Pisumi ilungersunartumi suliat pisut assingusut arlaqartut, meeqqat illersuisuat, Aviâja Egede Lynge taamani oqarpoq.
- Piffissaq kingulleq ingammik, meeqqat meeraqatiminnik sakkortoorujussuarmik pissusilersortut. Tassa timikkut tarnikkullu persuttaaneq, ajoraluartumik meeraqatiminnut atoraat ernumassutigineqarluni saaffiginnissutaasarpoq. Taakku saniatigut aamma uagut nammineq malinnaanertigut takuneqarsinnaalluni, Aviaja Egede Lynge ukiup marloqqissaat matuma siorna KNR-imut oqarpoq.
Node link
Title
Severinep ernera saassunneqartoq: Anaanatut ernumanarpoq kamaammernarlunilu
Tassunga tunngatillugu politiit taamani aamma ima oqarput:
- Inuusuttut akornanni sakkortuumik persuttaasarnerit amerliartortut nalaattalerpagut. Inuusuttut filmiliorlutillu videoliaminnik inoqatinut attaveqaatinik siammarterisarnerat takussaavoq. Tamatuma saniatigut perluuteqarfigineqartunut persuttaanerit aamma inerteqqutaasumik pillaassutaasinnaasumillu siammarterneqarnerat iluanngilaq, Kalaallit Nunaanni Politiit pinaveersaartitsinermut misissuinermullu pisortaat, Mikkel Høj Svendsen oqarpoq.
