Nuummi portørit suliatik unitsikkallarniaraat

Peqqinnisaqarfimmi nutaanik pitsanngorsaaniarnermut atugassanik pinasuartumik aningaasaliisoqarneratigut suliamik marloriaatinngornissaat Nunatsinni Portørit Peqatigiiffiata aarleqqutigaat.

Assersuutigalugu portørit Nuummi Dronning Ingridip Napparsimmavissuani ikinnerpaamik marlunnik ilaneqarnissaat piumasaraat:

- Naaperiarniarlugit maannakkut nalunaaqutaq pingasunut suliat akunneq ataaseq ataallugu unitsikkallarlugit Dronning Ingridip Napparsimmavissuani qullersat ataatsimeeqatigissavagut. Portørit ikinnerpaamik marlunnik ilaneqarnissaat angorusulluinnaqqissaarparput. Qangali taanna suaartaatigiuartaratsigu, Nunatsinni Portørit Peqatigiiffianni siulittaasoq Ujarak Jessen Heinrich KNR-imut taama oqarpoq.

Portørit ernumanerannut Peqqinnissaqarfimmut pinasuartumik aningaasaliissutit peqqutaaapput.

Aningaasaqarnermut Akileraartarnermullu Ataatsimiititaliap Peqqinnissaqarfimmut pinasuartumik aningaasaliissutissat 10 milliuunit koruuniusut ukioq aallartittoq akuerai.

Sivisunerusumik utaqqeratarsinnaanertik ernumatigigaat

Taakkunannga 3,5 millionit koruunit sulisut amerlinerinut atorneqassapput. Peqqinnissaqarfimmummi saaffiginnittut ukiuni kingullerni amerliartuinnarsimasut, naalakkersuisoqarfik nalunaarpoq.

- Nuummi innuttaasut ukiuni arlalinni amerliartuinnarsimapput. Taamaattumillu innuttaasut sullinneqarnissaat qularnanngitsumik amerlanernik sulisoqalertariaqarput, Mimi Karlsen allappoq.

Taamaalippat napparsimmaviliaanneqartussat napparsimmavimmiillu angerlaanneqartussat sivisunerusumik utaqqisalernissaat, portørit siulittaasuata naaatsorsuutigaa.

Taamaammat portørit amerlisariaqartut, portørit isumaqarput.

Portørimmi piumasaqaataat naammassineqarsinnaanngippata qanoq pisoqassanersoq Ujarak Jessen Heinrich aperaarput:

- Ataatsimeeqatigeqqaalaartigit, taava takussavarput qanoq kinguneqarumaarnersoq. Paasinarsiumaarpoq tamanna, Ujarak Jessen Heinrich, Nunatsinni Portørit Peqatigiiffianni siulittaasoq taama oqarpoq.

Suliamik unitsitsigallarnermi pinasuartumik suliassanut sillimasoqassasoq, taassuma neriorsuutigaa.