Nuummit Kapisilinnut arpartitsisoqarnianngitsoq

Nuukkap Extreme Running Race tassaavoq Nuummiit Kapisilinnu arpalluni pisuluniluunniit unammineq, 110 kilometerisut isortartussusilik.

Unammineq ulluni pingasunik ingerlanneqartarpoq, arpattut namminneq tupermi nassataaminnik unnuisarput apuuffissaminnut pinissami tungaanut.

Aaqqissuisut tupernik angisuunik ilioraasarput taakku neriffissatut, anartarfissatut, sillimaniarnermut atortunik allanillu atorneqartarput.

Atortussalli ukioq manna amigaatigineqarput.

- Tuqqit, anartarfimmut atortortut, sillimaniarnermut atortut allallu pisariallit amigaatigigatsigit aaqqissuussineq ukioq manna piviusunngortissinnaasimanngilarput,

Nuukkap Extreme Running Racemi aaqqissuussisut ilaat, Nuunu Chemnitz Berthelsen KNR-imut taama oqarpoq.

Peqataasut 30-niit 130-nut 

Nuummiit Kapisilinnut arpalluni pisulluniluunniit unammineq 2013-imiilli aasat tamaasa ingerlanneqartarpoq.

Ukiunilu kingullerni ilismaneqaleriartornera ilutigalugu peqataasartut amerliartorput.

- Ukioq manna peqataaniarlutik nalunaartut amerlasoorujussuugaluarput, allaa Danmarkimiit Amerikamiillu tikittoqartussaagaluarpoq, kisianni ajoraluartumik unammisissinnaanngilagut.

- Kisianni aappaagumiit ukiut tamakkerlugit ingerlanneqartaqqilernissaa naatsorsuutigaarput, Nuunu Chemnitz Berthelsen oqarpoq.

Sooruna atortut pigiunnaarisi?

- Tassa una arpatitsineq uagut ilaqutariit namminersuullugu ingerlattalertussaagatsigu, siusinnerusukkut Godthåb halimiit ingerlanneqartaraluarpoq.

- Taamaamma atortut atorneqartartut tamakkerlugit nammineq pigilertussaavagut. Taamaammat aappaagumut qilanaartuusiisinnaavugut.

Ilaasartullu amerliartornerat ilutigalugu naggueqatigut Inuit Canadameersut aamma peqataasalernissaat aaqqussuisunit kissaatigineqarpoq.

Unammisitsineq Nuukkap Adventure Racemik taaguuteqalissaaq.